DigiD ta habri bali na Boneiru

Notisia | 10-04-2019 | 19:31

Hulandesnan ku ta biba den eksterior por hasi petishon pa un DigiD riba www.digid.nl i mester pasa buska nan kódigo di aktivashon na un di e balinan di DigiD. Entrante 10 di aprel 2019 tin e posibilidat pa pasa buska un kódigo di aktivashon na e bali di Belastingdienst/CN na Boneiru.

Djamars 9 di aprel 2019 e Sekretario di Estado, Raymond Knops (Asuntunan Interior i Relashonnan den Reino), huntu ku e direktor di Belastingdienst/CN, Nichalin Martina, a hasi e apertura ofisial di e bali di DigiD na e ofisina di impuesto na Boneiru. Entrante awor ta posibel pa bo buska bo kódigo di aktivashon pa DigiD na Boneiru tambe na e bali aki.

Kiko ta DigiD i kiko mi por hasi kuné?

Ku bo DigiD bo por legitimá bo mes riba internèt, entre otro bo por ‘log in’ riba wèpsaitnan di gobièrnu hulandes, Mijn DUO (finansiamentu di estudio) i fondonan di penshun. Por ehèmpel pa asuntunan di belasting na Hulanda Oropeo. Ku un DigiD èks studiantenan por wak den Mijn Duo e montante di nan debe di estudio serka DUO, kambia datonan online i wak pòst digital di DUO.

Ami tambe por pidi un DigiD?

Pa hasi un petishon pa un DigiD for di Boneiru bo mester kumpli ku algun kondishon:

Bo ta biba pafó di Hulanda, i bo no ta inskribí na Hulanda Oropeo; bo tin nashonalidat hulandes;
Bo tin un pasport hulandes òf tarheta di identifikashon hulandes bálido;
Bo tin un ‘burgerservicenummer’ (BSN);
Bo ta disponé di un telefòn mobil riba kua bo por risibí mensahenan di sms tantu den eksterior komo na Hulanda;
Bo tin un adrès di e-mail.

Mi kier hasi un petishon pa un DigiD

Pidi bo DigiD via www.digid.nl. Skohe ora di hasi e petishon pa "Ik woon buiten Nederland". Paga tinu! Keda kòrda bo nòmber di usuario i ‘password’ bon. Despues di hasi e petishon bo ta risibí un kódigo di bali. Despues bo ta traha un sita ku Belastingdienst/CN pa pasa buska e kódigo di aktivashon di bo DigiD.

Traha un sita pa bo kódigo di aktivashon

Si bo kier pas buska bo kódigo di aktivashon di DigiD, bo mester traha un sita ku Belastingdienst. Esaki ta posibel di djaluna te ku djabièrnè, entre 09.00 or i 12.00 or. Pa un sita bo por yama +599 715 8806. Trese bo kódigo di bali i bo pasport hulandes òf tarheta di identifikashon hulandes ora bo bin e sita na Belastingdienst. Aki bo ta risibí bo kódigo di aktivashon, ku kua bo por finalisá riba digid.nl e proseso di petishon. Paga tinu: bo mester pasa personalmente pa buska bo kódigo di aktivashon.

Mas informashon?

Bo kier sa mas tokante e petishon di un DigiD pafó di Hulanda Oropeo? Wak riba e wèpsait di DigiD.