Inisio kampaña di informashon elekshon di Parlamento Oropeo

Riba djaweps 23 di mei tin elekshon di Parlamento Oropeo. Pa informá habitante di Boneiru, Saba i Sint Eustatius tokante e proseso di vota, Rijksdienst Caribisch Nederland (RCN) ta start ku un kampaña di informashon riba 11 di aprel. 

Un bia den kada 5 aña ta skohe e miembronan Hulandes di Parlamento Oropeo. Den Parlamento Oropeo ta tuma desishon importante tokante tópikonan manera turismo, kambio di klima i seguridat. E habitantenan di Hulanda Karibense ku nashonalidat Hulandes, ku tin 18 aña òf mas di edat i ku no ta ekskluí for di derecho di voto, por vota.

RCN ta informá habitantenan tokante e proseso di vota pa medio di  aviso den korant, poster, aviso via televishon i spòt na radio. Banda di esei ta usa Facebook, tambe e wèpsait di RCN lo tin informashon general di e elekshon. Temanan ku lo trata ta: kiko mester bai kuné urna? Kiko ta un prueba di identidat bálido? Kon bo ta apoderá un hende pa vota pa bo? Kiko bo tin ku hasi ora bo pèrdè bo karchi di vota? I unda tin urna pa vota? 

RCN ta ehekutá e kampaña di informashon riba enkargo di Ministerio di Asunto Interno i Relashon di Reino. E Entidatnan Públiko ta responsabel pa organisashon di e elekshonnan.

Pa mas informashon bishitá www.rijksdienstcn.com/parlamentooropeo òf nos página di Facebook Verkiezingen Europees Parlement CN. 

Tur voto ta konta!