CBS ta kuminsá investigashon di kas di hür na Sint Eustatius
For di medio aprel te medio mei di e aña aki Ofisina Sentral di Estadístika (CBS, Centraal Bureau voor Statistiek) na petishon di gobièrnu di Sint Eustatius i ministerio di Asuntunan Interno i Relashonnan di Reino ta hasi un investigashon di kas di hür. Ku e investigashon aki CBS ke haña un bista general di e karakterístikanan di kas di hür.
Gobièrnu lo usa e informashon di e investigashon pa mehorá e legislashon aktual relashoná ku preis di hür. Den kuadro di mehorashon di merkado di kas di hür sosial i e promoshon di bon mantenshon, mester bini mas igualdat entre e preisnan di hür di doñonan di propiedat inmóbil públiko i privá, kaminda e preis di hür ta dependé di e kalidat di e kas.
A base di dato ku CBS a kolektá por desaroyá un sistema di punto pa balorá un kas. A base di esaki Entidat Públiko di Sint Eustatius por instalá un komishon di hür, un organisashon imparsial ku ta duna bon yudansa na hürdó i doño di propiedat inmóbil dunando informashon, hasiendo investigashon, intermediando den konflikto òf, si ta nesesario, reglando e konflikto formalmente dunando un huisio ku ta obligatorio pa tur dos partido.
E investigashon di kas di hür ta un investigashon basá riba un muestra, ku ta tene bou di habitante di kas di hür. Entrevistadó di CBS lo bishitá 260 kas di hür na e isla pa registrá e karakterístikanan di e propiedat inmóbil manera e sitio, e preis di hür, e tipo di edifisio i e kantidat di kamber di baño i kamber di drumi.
Pa lei, CBS tin e obligashon di trata tur dato kolektá na un manera estriktamente konfidensial. Esaki ta un obligashon di CBS ku ta stipulá den lei. Pa e motibu aki, CBS ta tuma diferente medida pa protehá bo dato. E mesun lei ta konta pa e entrevistadónan tambe. Kada entrevistadó tin e deber di legitimá su mes na momento ku e presentá na e habitante. Ya asina tur hende por ta sigur ku ta trata di un representante di CBS.
Bo aporte ta sumamente importante pa e investigashon aki. CBS i Entidat Públiko di Sint Eustatius ta gradisí tur persona ku lo tuma parti den e sondeo pa nan koperashon.
Pa mas informashon i pregunta por tuma kontakto ku CBS na number di telefòn +599 717 8676 òf via caribischnederland@cbs.nl.