Safe House Sint Eustatius prioridat pa minister Dekker
Minister di protekshon di derechonan di Ministerio di hustisia i siguridat, Sander Dekker, tabata di bishita na Sint Eustatius riba djaweps 11 di aprel i djabièrnè 12 di aprel último.
Aki ela reuní ku stakeholders pa interkambio riba vários tema ku ta di importansia pa Sint Eustatius. Den e enkuentro ku partnernan di kadena di hustisia, kuido, polis, kuido pa víktima, dòkternan di kas trahadónan sosial i Reclassering, e atenshon tabata riba e problemanan serka hubentut, violensia doméstiko i maltrato hubenil. Minister Dekker a enfatisá ku lantamentu di un asina yamá Safe House ta un prioridat pa su ministerio.
"Mi a keda impreshon pa e dedikashon di tur partner enbolbí na Sint Eustatius pa yuda famianan ku ta den problema. Si nan uni forsa nan por hasi un diferensia den bida di e hendenan. Mi ta kontentu di mira e frutanan di e palabrashonnan ku nos a hasi aña pasá. E meta prinsipal ta pa evitá krímen, pero si un hende na Sint Eustatius bira víktima di agreshon ta importante pa e por haña e kompensashon ku e mester i tin derecho riba dje. Mi ta kontentu di por bisa ku Schadefonds Geweldsmisdrijven ta disponibel awor pa yuda abitantenan di Sint Eustatius” segun Minister Sander Dekker.
Eksámen
Komisario interino di gobièrnu sentral Mervyn Stegers i minister Sander Dekker durante di un enkuentro a papia tokante e Safe House pa víktima di maltrato doméstiko, rehabilitashon, implementashon di kastigu hubenil, Bavpol (polis ekstraordinario) i realisashon di e kapasidat di detenshon. "Entretantu 15 habitante a pasa nan eksámen pa bira agente ekstraordinario i por kontrolá riba tereno di medio ambiente, pèrmit i siguridat di tráfiko. A logra esaki dor di un bon koperashon ku e ministerio. “Ta hasi un apelashon na komunidat di Statia pa duna e funshonarionan aki e koperashon i rèspèt nesesario. ", Asina komisario interno di gobièrnu sentral Mervyn Stegers a bisa.