ACM ta stipulá tarifanan máksimo 2020 pa Boneiru i Saba

ACM ta stipulá tarifanan máksimo pa e produkshon i distribushon di elektrisidat i awa di bebe anualmente den Hulanda Karibense a base di e kostonan ku e produktornan i distribuidónan ta hasi.

E kompanianan aki na final ta determiná e tarifanan ku nan ta kobra nan klientenan na 2020, teniendo kuenta ku e límitenan ariba ku ACM a stipulá. Ademas e kompanianan por hasi un petishon na e Ministerionan konserní pa otorgá un supsidio riba e tarifanan ku un konsumidó ta paga pa tin un konekshon. Den añanan anterior semper esaki a sosodé. 

E idea general ta ku na Boneiru i Saba e tarifanan máksimo di uso (tarifa di kWh i m3) lo baha entrante promé di yanüari 2020. E límitenan ariba pa e tarifanan fiho (pa tin un konekshon) ta mustra un subida leve riba ámbos isla, ku diferensianan chikitu den e desaroyo pa kategoria di konekshon.  

ACM pronto lo stipulá e tarifanan máksimo pa Sint Eustatius tambe.

Boneiru

Pa Boneiru e tarifa di uso máksimo di elektrisidat ta baha di mas o ménos 0.27 USD/kWh na mas o ménos 0.22 USD/kWh. E límite ariba pa e tarifa Pagabon (pre-pago) ta baha di mas o ménos 0.47 USD/kWh na mas o ménos 0.43 USD/kWh. E bahadanan aki prinsipalmente tin di haber ku kostonan mas abou ku ta ferwagt pa e produkshon di elektrisidat. Pa e uso di un famia promedio esaki ta nifiká un bahada di mas o ménos 11 – 13 USD pa luna riba e kuenta di elektrisidat.

E tarifa máksimo pa uso di awa di bebe ta baha di mas o ménos 4,44 USD/m3 na mas o ménos 3,77 USD/m3. Pa un famia promedio esaki ta nifiká un bahada di mas o ménos 5-7 USD pa luna riba e kuenta.

Tantu pa elektrisidat komo pa awa di bebe e límitenan ariba pa e tarifanan fiho (pa tin un konekshon) lo subi levemente, ku un promedio di mas o ménos 1,5%.