Tarifanan máksimo 2020 pa produkshon i distribushon di elektrisidat i awa di bebe stipulá na Sint Eustatius
E Outoridat Konsumidó i Merkado (ACM) a stipulá e tarifanan máksimo pa produkshon i distribushon di elektrisidat i awa di bebe na Sint Eustatius manera lo ta válido entrante promé di yanüari 2020. Resientemente ACM a hasi esaki pa Boneiru i Saba tambe.
ACM ta stipulá tarifanan máksimo pa e produkshon i distribushon di elektrisidat i awa di bebe anualmente na Hulanda Karibense a base di e kostonan ku e produktornan i distribuidónan ta hasi. Na Sint Eustatius STUCO ta determiná e tarifa ku nan ta kobra nan klientenan na 2020, teniendo kuenta ku e límitenan ariba ku ACM a stipulá. Ademas STUCO por hasi un petishon na e Ministerionan konserní pa otorgá un supsidio riba e tarifanan ku un konsumidó ta paga pa tin un konekshon. Den añanan anterior semper esaki a sosodé.
Koriente
Pa Sint Eustatius e e tarifa di uso máksimo di elektrisidat ta keda na mas o ménos 0,30 USD/kWh. E límite di tarifanan fiho pa konekshon riba ret di koriente ta baha ku 10%. Esaki ta pasobra ta antisipá un subida den e kantidat di konekshon na 2020.
Awa di bebe
E tarifa máksimo pa uso di awa di bebe ta baha di mas o ménos 7,87 USD/m3 na mas o ménos 6,63 USD/m3. Esaki tin di aber ku echo ku a antisipá un oumento di e kantidat di produkshon di awa di bebe na 2020 lokual ku ta pone ku e gastunan pa m3 pa awa di bebe ta mas abou. Pa e uso di un famia promedio esaki ta nifiká un bahada di mas o ménos 10-15 USD pa luna riba nan kuenta.
E tarifa máksimo di tarifa fiho pa konekshon di awa di bebe ta subi ku mas o ménos 38%. Esaki tin di aber ku subida di gastunan den 2020 di STUCO i pasobra den último añanan aki e kompania tabatin mas gastu ku loke a premirá. Dor ku STUCO por pidi suisidio riba e tarifa aki ta pronostiká ku e tarifa real ku STUCO lo kobra lo ta mas abou.