Dia di Privasidat den kuadro di medio sosial

E aña akí Dia di Privasidat tabata den kuadro di medio sosial. Komo ku praktikamente tur hende ta usa medio sosial, Komishon supervishon protekshon di dato personal BES (Komishon) a dediká atenshon e aña aki na e loke bo por hasi i no mester hasi ku dato personal riba medio sosial.

Dia internashonal di privasidat

Komo ku tin hopi dato personal ku no ta dje bon ei protehá manera nos ta kere, hopi biaha ta fásil pa haña e informashon akí i ta mes fásil pa hasi mal uso di dje. Ta p’esei rònt  mundu ta dediká atenshon riba Dia di Privasidat na konsientisashon di derecho i deber riba tereno di privasidat. 

Nesesidat di informashon

Delaster añanan Komishon a duna hopi informashon na sektor públiko i sektor privá na Sint Eustatius, Saba i Boneiru. A dediká atenshon den esei na introdukshon di AVG na Oropa, (AVG ta Algemene Verordening  Gegevensbescherming, Dekreto General Protekshon di Dato), protekshon di dato personal den e relashon entre dunadó di trabou i trahadó,  privasidat den sektor di dunamentu di servisio  i por ehèmpel atenshon pa e tema di supervishon ku kámara. Glenn Thodé, presidente di Komishon ta deklará: “Nos ta ripará ku nesesidat di informashon tokante privasidat ta bira mas i mas grandi. Pa Komishon esei ta bon notisia, ta di gran importansia pa hende ta konsiente kon vulnerabel dato personal ta. E aña akí nos ta dediká atenshon spesial na kompilashon di dato personal di menor di edat via medio sosial.”

Inkorporá regla di privasidat den organisashon

Despues di basta aña di konsientisashon tokante e reglanan ku lei di privasidat ta trese kuné,  ta ora pa inkorporá e reglanan ei den proseso den organisashon. “Mester ta normal ku kada biaha ku bo atendé ku dato personal, bo ta puntra bo mes si e ta kumpli ku regla di protekshon di nan,” asina Roëlla Pourier, sekretario di Komishon ta bisa. “Ta p’esei lo ta bon si e reglanan di privasidat akí ta menshoná en todo kaso den kada manual di prosedimentu.”

Informashon na 2019


Banda di atenshon pa privasidat riba medio sosial riba Dia Internashonal di Privasidat, na aña 2019 Komishon ta sigui duna informashon tambe tokante tur tereno di privasidat. Di  prinsipio di protekshon di privasidat te konsekuensia di AVG pa empresa ku tin laso komersial na Oropa. Roëlla Pourier ta papia relashoná ku esei di un paso mas grandi ainda:
“Lo ta bon si supervisor riba tereno di privasidat den region di Karibe traha huntu ku otro, esei lo benefisiá tur hende, tur hende ta sali ganá.” 

E komishon ta un órgano independiente ku ta supervisá prosesamentu (entre otro  almasenamentu i uso) di dato personal. Bo ta haña mas informashon riba website www.cbpbes.com. Pa pregunta tokante e manera ku mester atendé ku dato personal, bo por  tuma kontakto ku Roëlla Pourier di sekretariado: roella.pourier@rijksdienstcn.com, telefòn +599 7158392.