Promé reunion Centraal Dialoog Bonaire ta un echo
Centraal Dialoog Bonaire a instalá komo kuerpo konsultivo na fin di 2018. E órgano aki ta konsistí di representantenan di Entidat Públiko Boneiru, USIBO, dunadónan di trabou (BBE, BONHATA, BHG) i Kámara di Komèrsio i ta bou di guia di Gezaghebber den kapasidat di presidente i tambe un presidente tékniko.
Centraal Dialoog Bonaire ke desaroyá un base di sosten pa un maneho dirigí riba un Boneiru sosial, ekonómiko i ekológiko. Riba 31 di yanüari i 5 di febrüari último a tuma lugá e promé reunionnan. Aki a stipulá dos deklarashon: un tokante e akuerdo intergubernamental 2018-2022 i un tokante aplikashon di e ‘espasio finansiero’ a konsekuensia di e redukshon di prima di dunadó di trabou pa 2019.
Deklarashon tokante akuerdo intergubernamental 2018-2022
Centraal Dialoog Bonaire ta respetá responsabilidat propio di partidonan pa loke ta trata ehekushon di e akuerdo intergubernamental. Na mes momentu, algun tópiko di e akuerdo ta toka tambe trabou di e partidonan di Centraal Dialoog Bonaire. P’esei Centraal Dialoog Bonaire ke ta envolví den ehekushon di sierto parti di e akuerdo intergubernamental. Ta trata aki partikularmente di sentro di trabou / mediashon pa trabou, krèsh, bibienda sosial i desaroyo sosial-ekonómiko general.
Deklarashon tokante aplikashon di e ‘espasio finansiero’ a konsekuensia di e redukshon di prima di dunadó di trabou pa 2019
Den esaki dunadónan di trabou ta indiká ku nan ke usa e espasio kreá dor di e redukshon di prima, pa mehorá forsa di kompra, basta esaki ta hustifiká ekonómikamente.
Ademas ta konkluí unánimemente ku polítika integral dirigí riba kombatimentu di pobresa ta di gran importansia i ku lo sigui diskutié den Centraal Dialoog Bonaire. Centraal Dialoog Bonaire a disidí tambe pa manda un karta dirigí pa Sekretario di Estado di SZW tokante e importansia di un bon mínimo sosial ku ta korespondé ku gastunan di bida nesesario.
E siguiente reunion di Centraal Dialoog Bonaire ta planiá pa dia 15 di aprel próksimo.