10 porshento mas buelo na Hulanda Karibense na 2018
Na 2018 avionnan a bula sigur 23 mil bia pa i for di Hulanda Karibense, un oumento di 10 porshento kompará ku 2017. E kantidat di pasahero ku a transportá riba e buelonan aki a subi ku kasi 11 porshento. Tur tres aeropuerto di Hulanda Karibense a mustra sifra di kresementu. Asina CBS ta bisa a base di sifra nobo.
Na Aeropuerto Flamingo na Boneiru e kantidat di moveshon di avion na 2018 a subi ku sigur 9 porshento. Den kada luna di 2018 a yama mas biahero bon biní ku un aña promé. E kantidat di pasahero ku a yega i sali na e aeropuerto aki a oumentá ku sigur 11 porshento, te 359 mil i piku biahero. Desèmber ku 33.7 mil biahero tabata e luna di mas intensivo pa loke ta kantidat di hende riba e buelonan. E dia ku mas tantu hende tabata djasabra 22 di desèmber ku 2,2 mil pasahero. Sèptèmber ku 25.2 mil pasahero tabata e luna di ménos intensivo.
Pa pasahero na Aeropuerto Flamingo Kòrsou ta e lugá di mas popular di orígen (direkto) i destinashon. Sinembargo esaki no ke men ku Kòrsou ta e orígen berdadero òf destinashon final di e biahero.
12 porshento mas moveshon di buelo na Saba
Na Juancho E. Yrausquin Airport (Saba), e aeropuerto di mas chikí di Hulanda Karibense, e kantidat di buelo a subi ku kasi 12 porshento. E kresementu aki a tuma lugá no opstante e seramentu temporal di 10 di sèptèmber te 9 di òktober debí na mantenshon grandi. Na 2017 despues di orkan Irma tambe e aeropuerto a keda será un siman i mei i e skèdjel normal a bruá poko tempu.
E aeropuerto di Saba na 2018 a yama mas di 28 mil pasahero bon biní, di kua e mayoria a bula bai òf bini di Sint Maarten. E pista di aterisahe di e aeropuerto ta midi solamente 400 meter di largura i ta avion chikí ku ta karga 19 òf ménos pasahero so por baha i subi ei.
Mas moveshon di avion i pasahero pa Sint Eustatius
F.D. Roosevelt Airport na Sint Eustatius, na 2018 a mira sigur 6.8 mil avion baha i subi, 10.5 porshento mas ku na 2017. Pa loke ta pasahero na e aeropuerto aki tabata trata di 42 mil pasahero, un oumento di 11.5 porshento. Sint Eustatius tambe a sufri molèster di orkan Irma na 2017. Pa motibu ku nan ta keda mas den nort, Saba i Sint Eustatius ta mas sensitivo pa orkan ku Boneiru.
Fuente
StatLine - Hulanda Karibense; Aviashon, sifra mensual di aeropuerto