Oumento adishonal di AOV entrante 2020 dependiente di situashon personal

E oumento adishonal pa personanan ku derechi riba penshun AOV na Hulanda Karibense entrante promé di yanüari 2020, ta dependé di e situashon personal di e solisitante. E situashon di biba i di entrada ta determiná si un persona tin derechi riba e oumento i kon haltu esaki lo ta.

Dollars

Den un karta di Sekretario di Estado di Asuntunan Sosial i Empleo (SZW) Tamara van Ark, dirigí na Tweede Kamer i e rektifikashon riba esaki, ta menshoná montantenan spesífiko. Esta un oumento di 186 dòler kada dos siman pa Boneiru, un oumento di 233 dòler kada dos siman pa Sint Eustatius i di 224 dòler kada dos siman pa Saba.

Ku e oumento aki, entrante 2020,  ta suplementá e entrada propio te ku e suma di salario mínimo legal (Wettelijk Minimum Loon, WML). E montante ta dependé di e situashon di biba i e entrada di e persona konserní.E oumento por resultá mas haltu ku e montantenan menshoná, por ehèmpel si e persona konserní su AOV ta redusí. Pero, por ta asina tambe ku no tin derechi riba e oumento, den kaso ku e entrada total ya ta mas haltu ku e WML.

Personanan ku derechi riba penshun AOV bibá nan so na Boneiru, nan entrada mensual lo ta 894 dòler total entrante promé di yanüari 2020. Na Sint Eustatius ta trata di un montante di 1120 dòler pa luna i na Saba di 1076 dòler pa luna. Personanan ku derechi riba penshun AOV ku tin pareha tambe por bini na remarke pa e oumento, ora ku nan entrada konhunto ta bou di WML.