Inisio kampaña di informashon elekshon di Konseho Insular
Riba djarason 20 di mart 2019 habitantenan di Saba i Boneiru por vota pa elekshon di Konseho Insular. Pa informá habitantenan tokante e proseso di vota, Rijksdienst Caribisch Nederland (RCN) ta start ku un kampaña di informashon riba 6 di febrüari. E kampaña aki ta kore paralelo ku e kampaña di informashon pa elekshon di Kolegio Elektoral.
E kampaña lo ta amplio i ta konsistí di entre otro aviso den korant, poster, aviso via televishon i spòt na radio. Ademas lo pone un oloshi grandi na Boneiru ku ta marka e dianan ku falta pa e dia di elekshon. E lema ‘ken ta respresentá bo despues?’ tin komo meta pa pone votadónan pensa. Ku bo voto abo ta skohe e persona ku lo papia pa bo despues den Konseho Insular.
Henter e proseso di elekshon ta bini na remarke durante e kampaña di informashon. Temanan ku lo trata ta: kiko mester bai kuné urna? Kiko ta un prueba di identidat bálido? Kon bo ta apoderá un hende pa vota pa bo? Kiko bo tin ku hasi ora bo pèrdè bo karchi di vota? Unda tin urna pa vota? Etc. Pa mihó rekonosementu i pa por alkansá e votadónan mas optimal ta dirigí e kampaña di Saba i Boneiru riba e islanan. Asina nos lo mira modelonan lokal i lo duna informashon na Ingles, Papiamentu i Hulandes.
RCN ta ehekutá e kampaña di informashon riba enkargo di Ministerio di Asuntonan Interno i Relashon di Reino. E Entidatnan Públiko ta responsabel pa organisashon di e elekshonnan.
Pa mas informashon bishitá www.rijksdienstcn.com/elekshondikonsehoinsular òf nos página di Facebook Island Council Elections 2019. Ken ta respresentá bo despues? Vota riba 20 di mart!