Ehekushon di charter di ZVK Saba - Sint Maarten
E desishon pa for di 4 di mart kuminsá ku buelo di charter direkto di Saba pa Sint Maarten i visevèrsa ta salí for di krítika di tantu aseguradonan komo dòkternan na Saba i Sint Maarten dor di e situashon ku kada bes ta ripití kaminda Winair no tin sufisiente lugá disponibel.
Esaki ta sòru pa hopi inkonbeniensia pa nos aseguradonan ku pa trato médiko mester bai Sint Maarten i otro isla òf paisnan.
Ta konosí ku aña pasá Winair a adaptá su skema di buelo a konsekuensia di orkannan Irma i Maria. Esaki a resultá den un bahada supstansial di e kantidat di stulnan disponibel riba buelonan di i pa Sint Maarten. E situashon aki vários biaha tabatin komo konsekuensia ku aseguradonan mester a keda mas dia innesesariamente miéntras e kapasidat di hotèlnan na Sint Maarten ainda no ta optimal. Konsekuensia di e kantidat di stul limitá a kousa tambe problema serio den planifikashon di e dòkternan di Saba ku ta manda pashèntnan afó paso no por traha sita di forma efisiente den eksterior pa aseguradonan.
Un otro konsiderashon ku a kondusí pa laga ehekutá e buelonan di charter aki ta ku aseguradonan pa motibu di limitashonnan físiko di un forma mas fásil por drenta i sali for di e avion di Winair. For di sèptèmber 2018 ZVK tabata den konsulta estrecho tokante di e inkonbeniensianan aki ku gobièrnu i dòkternan Saba Health Care Foundation. Tambe ku miembronan di Kolegio Ehekutivo di Saba i lidernan di komunidat. Finalmente ZVK lo sigui hasi uso di Winair pa realisá buelonan via Sint Maarten pa Kòrsou i mas leu.
Transporte di outo
Pa loke ta trata e kuestion di transporte di outo ta ofresé e servisio di buska i hiba pa tur asegurado di Saba via di e Accessible Ventures. A sòru pa esaki pa transportá for di i pa sentronan di kuido médiko riba e isla i for di i pa aeropuerto, durante referensia médiko den eksterior. A inisiá e transporte aki komo un solushon temporal despues di orkannan Irma i Maria. Konforme e palabrashonnan den e areglo 'Regeling Aanspraken Zorg BES', personanan tin derecho riba transporte ku outo na momentu ku nan bini na remarke pa esaki konsiderando e nesesidat i e dunamentu di kuido adekuá. Ku otro palabra, ta e dòkter por pidi transporte speshal ku aprobashon di ZVK. Banda di esei tur asegurado ku ta bai afó pa kuido médiko ta haña un kompensashon di USD 30,00 pa kubri gastunan di transporte di i pa aeropuerto di Saba.
E ofisina di ZVK na Saba a komuniká e adaptashonnan den maneho na nos aseguradonan. E aseguradonan na Saba i komunidat di Saba por tin sigur ku kontinuamente ZVK ta evaluá su aktividatnan i na momentu ku ta nesesario lo hasi e adaptashonnan nesesario ku e meta pa ofresé kuido médiko efisiente pa tur asegurado di Saba, Bonaire i Sint Eustatius.