Blokhuis di bishita na Hulanda Karibense pa firma akuerdo di prevenshon
Sekretario di Estado Paul Blokhuis di e Ministerio di Salubridat Públiko, Bienestar i Deporte (VWS) lo ta di bishita na Hulanda Karibense for di djaluna 13 di mei te ku djaweps 16 di mei. Pa Sint Eustatius i Boneiru e ta bai firma e akuerdo karibeño pa prevenshon i deporte. Tambe e lo bishitá vários organisashon ku ta traha riba prevenshon i deporte. E ta finalisá su bishita ku un reunion ku ministernan di salubridat públiko di Aruba, Kòrsou i Sint Maarten. E sekretario di Estado ta presidí e reunion aki.
Aserkamentu pa sobre peso
E ambishon di e akuerdo ta un Hulanda Karibense mas salú ku muchanan ku tin un bon inisio di nan bida, adultonan aktivo i grandinan ku mas aña di salú. Aki un estilo di bida salú ta pará sentral bou di e lema: ‘prevení ta mihó ku kura’. Ta pa e motibu aki e akuerdo tin un patronchi di kome salú, stimulá pa hasi sufisiente deporte i moveshon i stòp di huma. Ku e akuerdo aki ta amplia e empeño di e fundashon Jongeren op Gezond Gewicht (JOGG) pa sòru pa e kantidat di mucha ku sobre peso baha. Esaki, dor di entre otro ofresé kuminda salú i fruta na skolnan i na akohida pa mucha. Tambe tin atenshon pa mehorashon di salú seksual dor di stimulá uso di antikonseptivo i dor di krea posibilidat pa di forma fásil realisá tèstnan riba enfermedatnan ku ta transmití seksualmente.
Tur mucha un komienso salú
Sekretario di Estado Blokhuis ta kontentu ku awor Hulanda Karibense tambe tin su akuerdo di prevenshon: “Den Reino kompleto muchanan meresé un komienso salú. Den esaki nos a wak bon na e situashon lokal: kiko ta funshoná i kiko no. Banda di esei ta stimulá komunidat pa nan mes drenta den akshon pa sòru pa un Hulanda Karibense mas salú. E konosementu i esfuerso ta bira struktural.”
Move mas
Blokhuis huntu ku komisario di gobièrnu sentral Mike Franco i e direktor di Cruyff Foundation lo habri e resien renobá Cruyff Court na Sint Eustatius. Speshal pa e apertura aki e eks hungadó di futbòl na nivel internashonal Anouk Hoogendijk lo ta presente komo embahador. Cruyff Court ta forma e kurason di hasimentu di deporte i moveshon na Sint Eustatius. Aki ta firma e akuerdo karibeño di deporte i prevenshon.
Na Boneiru e sekretario di estado lo tin un almuerso salú ku e organisashon pa hóben Jong Bonaire i tambe e lo ta presente pa e lèsnan di gym kaminda lo lanta e grupo di edukashon riba moveshon. E profeshonalnan aki lo no bai sòru solamente pa edukashon riba moveshon pero tambe nan ta bai yuda pa bini un programa amplio ku ta ofresé deporte i moveshon pa tur hende.
Moveshon no solamente ta importante den e lucha kontra sobre peso pero ta sòru tambe pa adulto i grandinan fit.
Blokhuis ta papia durante di su bishita tambe na un konferensia tokante prevenshon ku a organisá huntu ku e departamento di salubridat públiko.
Mihó palabrashon tokante mayor di kriansa
Na Boneiru Blokhuis tin kombersashon tambe ku mayor i yunan di kriansa pa tende kiko nan ta pensa di e plannan nobo tutela. Den e plannan aki tin palabrashon tokante kiko ta spera di famianan di kriansa, ki sosten i guia kuido pa hubentut i famia ta ofresé i ki tipo di kompensashon mayornan di kriansa ta haña pa e kuido. E plannan ta duna aklarashon riba e ròl, espektativa i ta sòru pa un forma importante di kuido pa hubentut ta mihó reglá. E sekretario di estado lo informá Tweede Kamer na komienso di otro siman riba esaki.
Reunion Ehekutivo
Durante di e reunion ehekutivo e mandatarionan di paisnan den Reino ta papia tokante diferente tópiko riba tereno di salubridat públiko. Lo hasi palabrashon riba koperashon pa loke ta trata kuido médiko na momentu di krísis i kalamidat i akseso na remedi i kalidat di kuido.