Paul Blokhuis ta pone anualmente 1,5 mion disponibel
Sekretario di Estado Paul Blokhuis a firma na Sint-Eustatius e akuerdo di deporte i prevenshon Hulanda Karibense.
Meta de e akuerdo aki ta un Hulanda Karibense mas salú ku mas atenshon pa prevenshon i den kuadro di un estilo di bida salú. E akuerdo ta bai tokante sinku tema: sobre peso, problema di uso di alkohòl, humamentu i uso di droga, deporte i moveshon, salú seksual i un mihó struktura di organisashon di deporte i prevenshon. E siman aki Blokhuis ta firma e akuerdo aki ku representantenan di Boneiru tambe. Pa e akuerdo di deporte i prevenshon karibeño tin anualmente 1,5 mion euro disponibel.
Pa Saba e palabrashonnan tokante di prevenshon i deporte ta forma parti di pakete mas amplio pa e isla. E palabrashon aki tambe e ministerio ta hasi na nòmber di e ministerio di asuntunan interno i relashon den Reino i tambe e otro ministerionan.
Importansia di e konteksto lokal
Blokhuis: “Tur kaminda den Reino nos ke krea e posibilidat pa hendenan di un forma fásil hasi eskoho pa un bida mas salú.. Pero ta importante pa nos wak e sirkunstansianan lokal. Kiko ta nesesario aki. Aki por ehèmpel humamentu no ta un problema hopi grandi pero sobre peso si. Mitar di e abitantenan di Hulanda Karibense no ta move sufisiente. Bou di mucha e problema aki ta aun mas grandi. Esaki tin di aber ku akseso i loke tin pa ofresé na fasilidat riba e islanan. Hopi biaha e solushon ta den kosnan chikí, manera bon iluminashon na fasilidat di deporte pa asina hendenan por hasi deporte den oranan di anochi tambe. Pero tambe por ehèmpel un dak pa tapa solo. E akuerdo ta duna loke ta funshoná i ta posibel na e islanan”.
Enfoke riba hubentut
Den e akuerdo pa Hulanda Karibense tin tambe hopi atenshon pa hubentut. Ku material pa skol pa skolnan sekundario tokante maluso di alkohòl, tabako i droga, ofresé kuminda salú na skol i organisashonnan di deporte kaminda no ta huma, muchanan di Hulanda Karibense tambe ta kuminsá di un forma salú. Aki ta hasi uso di inisiativanan ku na Hulanda tabata hopi eksitoso manera JOGG i Gezonde School. Meskos ku na Hulanda e kompensashon pa un coach di estilo di bida i guia pa stòp di huma ta bini den pakete básiko.
Salú seksual
Otro for di e akuerdo nashonal di prevenshon e akuerdo di deporte i prevenshon Karibeño ta dirigí tambe riba salú seksual.
E kantidat di aborto na Hulanda Karibense ta hopi haltu i e sifranan di enfermedat ku ta transmití seksualmente manera chlamydia i gonorroe ta haltu. Meta di e akuerdo aki ta pa tin un bahada den esaki i un subida den uso di antikonseptivo. Ta bai sòru pa mihó edukashon seksual na skol, sosten pa e hende muhé na momentu ku nan sali na estado i ke hasi aborto i lo parti kondon grátis.