Bai directamente na kontenido

Estudio nobo di MBO mester redusí skarsedat di spesialista di ICT

Notisia | 01-11-2019 | 20:04

Riba djaweps 31 di òktober a tuma lugá un reunion ku gobièrnu- i empresarionan tokante di un estudio di MBO ku lo inisiá na 2020 pa redusí skarsedat di spesialista di ICT na Hulanda Karibense.

RCN en MBO estudio ICT
Deskripshon di potrèt: Komunidat empresarial i gobièrnunan ke uni forsa pa eduká hóbennan di Hulanda Karibense pa bira spesialista di ICT. Tabata presente: Flamingo TV, IBO Bonaire NV, SGB, OLB, Infotrans, ACS Curaçao, WEB, Telbo, Bearingpoint, Fundashon Mariadal, Skillsprof, Belastingdienst CN, ROA CN, SZW Bonaire, SSO CN.

Rijksdienst Caribisch Nederland ta traha konhuntamente ku MBO Bonaire pa inisiá e estudio nobo aki riba término kòrtiku i a tuma e inisiativa pa invitá gobièrnu- i empresarionan i uni forsa. Tur organisashon partisipante a indiká ku nan tin difikultat pa reklutá personal di ICT bon kapasitá. Nan ke traha huntu pa aliniá e programa di estudio na e práktika profeshonal i pa ofresé espasio pa kore stazje.

MBO Bonaire a presentá e dosié di edukashon riba djabièrnè promé di novèmber na ROA pa e estudio di MBO ‘IT Systems and Devices’. Segun planifikashon, e estudio lo inisiá na ougùstùs 2020 riba nivel di MBO-3 i MBO-4. E estudio pa gran parti ta bini di ROC Mondriaan for di Hulanda.

Hóbennan ku ta deseá pa sigui e estudio, por tuma kontakto ku MBO Bonaire pa mas informashon òf registrashon na: 717 8120. MBO Bonaire ta bai aserka hóbennan di Kòrsou, Aruba, Saba i Sint Eustatius tambe pa sigui e estudio aki. Aktualmente ta konsiderando fasilidat di ‘campus’.