Konsulta Ministerial di Kuater Pais Enseñansa, Kultura i Siensia desde awor anualmente
Riba 11 i 12 di novèmber último, pa di dos biaha e aña aki, e ministernan di Enseñansa, Kultura i Siensia di Reino a reuní durante Konsulta Ministerial di Kuater Pais, e asina yamá ‘vierlandenoverleg’.
Despues di e promé reunion di e kuater paisnan riba 7 i 8 di febrüari último na Kòrsou, e biaha aki minister di Hulanda, Ingrid van Engelshoven, a risibí su koleganan Marilyn Alcalá-Wallé (Kòrsou), Rudy Lampe (Aruba), Minister Plenipotensiario Guillfred Besaril di Aruba (remplasando minister di Kultura, Xiomara Maduro) i Minister Plenipotensiario Jorien Wuite di Sint Maarten (remplasando minister Wycliffe Smith). E ministernan di region Karibense tabata tránsito pa e Konferensia General di Unesco na Paris, ku a kuminsá riba 13 di novèmber.
E ministernan a palabrá ku desde awor e Konsulta Ministerial di Kuater Pais Enseñansa, Kultura i Siensia lo tuma lugá anualmente. Durante e añanan impar (‘oneven’), e reunion lo tuma lugá na Hulanda, semper siguiendo e Konferensia General kada dos aña di Unesco. Den e añanan par (‘even’), e lo tuma lugá na un di e paisnan den Karibe. E palabrashon aki ta pará den e Protokòl di kolaborashon Enseñansa, Kultura i Siensia entre Aruba, Kòrsou, Sint Maarten i Hulanda, ku a firma djaweps último 12 di novèmber na Den Haag.
E ministernan a hasi sigur 30 palabrashon tokante nan kolaborashon. Entre otro a disidí ku e paisnan lo ratifiká i implementá e konvenio di Unesco 2001 tokante arkeologia supmarino na mes momentu. Tambe Biblioteka Real (Koninklijke Bibliotheek) lo kuminsá traha ku e bibliotekanan di Aruba, Kòrsou i Sint Maarten pa yega na akuerdonan tokante konekshon riba su biblioteka digital.
E ministernan a palabra pa hasi un destaho pa un investigashon eksterno tokante e problemátika di konekshon di studiantenan di Reino. Durante e siguiente Konsulta Ministerial di Kuater Pais na 2020 lo hasi presupuesto, entre otro a base di e investigashon aki, tokante mehorashon di e éksito di estudio di studiantenan di e islanan Karibense. Ademas lo investigá e posibilidatnan di un fondo pa promové e mobilidat entre studiantenan den Reino.
Finalmente e ministernan a disidí ku konhuntamente nan lo traha riba mehorashon di komunikashon i informashon tokante finansiamentu di estudio, ku ta efektivo den konteksto Karibense. Lo eksplorá si outomátikamente por implementá pago bèk di debe di estudio na DUO teniendo kuenta ku kapasidat. I na 2020 lo evaluá e funshon di lokèt temporal di DUO na Aruba i Kòrsou.