Otro aña elekshon nobo na Sint Eustatius

Notisia | 24-09-2019 | 17:17

Esaki Sekretario di Estado Knops (di Asuntunan Interior i Relashon den Reino) a bisa durante un enkuentro públiko ku abitantenan di Statia tokante e situashon rondó di restablesimentu di órden gubernamental na e isla. 

Sekretario di Estado Knops: “E situashon ku nos a topa un aña i mei pasá tabata hopi serio. Entretantu a realisá hopi trabou i e promé resultadonan ta visibel. Konsiderando e mehorashonnan i e echo ku mi ta haña importante pa abitantenan di Statia skohe nan mes representantenan, e intenshon ta pa riba 21 òktober 2020 organisá elekshon di Konseho Insular. Ku esaki nos ta pone un siguiente paso importante pa strukturalmente yega na un situashon di gobernashon normal.”

Intervenshon

E Sekretario di Estado a rekordá ku e intervenshon di febrüari 2018 tabata nesesario pasobra e situashon gubernamental na Sint Eustatius tabata tipifiká pa negligensia grandi di tarea. Por a papia di anarkia i mal maneho finansiero, pero tambe diskriminashon, menasa, intimidashon i ofensa, kièr i buskamentu di poder personal a kosto di abitantenan di Sint Eustatius. E situashon gubernamental i e retaso físiko di e isla tabatin konsekuensia drástiko pa e bida diario di e abitantenan di Sint Eustatius.

E promé resultadonan visibel

Dor di entre otro esfuerso di e aparato gubernamental i abitantenan di Statia por mira despues di un aña i mei e promé resultadonan riba tereno físiko i sosial-ekonómiko. Asina a restorá e bahada na e klef ku tabata sufri di eroshon i trabou di  stabilisashon di e klef ta kanando bon.   Fangumentu di áwaseru ta keda un punto di atenshon pa e Sekretario di Estado pa evitá mas eroshon i pa sòru pa awa pa sektor di agrikultura i krio di bestia. Prosesamentu di shushi a mehorá ku un fòrnu nobo pa kima sushi i entretantu a saka mas ku 300 outo bieu for di e isla.

Entrega di Cherry Tree tin retraso pero ta pronostiká ku pa mart di otro aña esaki ta kla. Banda di esei Ministerio di BZK ta reservá sèn strukturalmente e aña aki pa baha hür i a firma un akuerdo di koperashon entre Entidat Públiko i e koperashon di bibienda  Woonlinie i BZK. Esaki ta enfatisá riba renobashon di bibienda sosial. Tambe a reservá  400.000 euro èkstra pa reparashon di kasnan. A hasi palabrashon tokante mínimo sosial kaminda ta subi benefisio sosial manera ònderstant i obligashonnan finansiero ta baha. Tambe ta introdusí e programa Bes(t) 4 kids kaminda ta regla akohida pa mucha promé i despues di skol mas mihó.   
 
Esaki no ta kita e echo ku negligensia riba sierto tereno ta grandi i ku mester di tempu pa trese kambio struktural den esakinan.  Pa e motibu aki ta traha na un struktura gubernamental sólido, un organisashon di empleado públiko efisiente i un situashon finansiero sano.  Asina ta krea un fundeshi sólido kaminda e gobernashon nobo ku elegí por sigui traha riba dje.