ACM ta publiká método pa stipulá tarifa
Autoriteit Consument & Markt (ACM) a publiká e método ku lo usa pa stipulá anualmente e tarifa máksimo pa produkshon i distribushon di elektrisidat i awa di bebe e próksimo seis añanan.
E método akí ta un kontinuashon di e aktual método, ku ta bálido pa e añanan 2017-2019. Di e forma aki ACM ta sigui stipulá e tarifanan máksimo a base di e gastunan real pa produkshon i distribushon di elektrisidat i awa di bebe riba e islanan. Al respekto ACM ta paga tinu riba efisiensia di e gastunan.
ACM ya pa algun aña ta supervisá legislashon tokante elektrisidat, awa di bebe, telekomunikashon i pòst.
Henk Don, miembro di direktiva di ACM: “E último añanan nos a haña hopi konosementu i eksperensia ku regulashon di tarifa riba e islanan. Nos por a hasi bon uso di esei pa e periodo nobo di regulashon. Di e forma akí nos ta duna un kontribushon na provishon di awa di bebe i energia konfiabel, duradero i pagabel riba e islanan.”