Sekretario di Estado Van Ark ta bishitá Boneiru
Sekretario di Estado Tamara van Ark (Asuntunan Sosial i di Labor), ta hasi un bishita di trabou na Boneiru di promé te ku 5 di òktober. E Sekretario di Estado entre otro lo hiba kombersashon ku partisipantenan di Diálogo Sentral Boneiru.
Riba djárason 2 di òktober, Van Ark tin un enkuentro ku gezaghèber di Boneiru, Edison Rijna. Tambe e lo papia ku Kolegio Ehekutivo i ku representantenan di dunadónan di trabou, empleadonan i Kámara di Komèrsio. Riba djaweps 3 di òktober, Van Ark lo hiba kombersashon ku Diálogo Sentral Boneiru, e plataforma di deliberashon lokal, resien lansá, na kua e partidonan menshoná lo partisipá. Diálogo Sentral ta papia tokante temanan ku ta kontribuí na un Boneiru sosial, ekonómiko i ekológiko, manera relashonnan laboral i redukshon di pobresa.
Laboral lokal
Riba djabièrnè 4 di òktober, e bishita di Sekretario di Estado ta den kuadro di merkado laboral lokal i akohida pa mucha. Van Ark, huntu ku diputado Nina De Heyer, lo bishitá e proyekto Krusada, kaminda hende ta traha bou di supervishon, den un ambiente sigur i adaptá. Tambe nan lo asistí na un presentashon e dia ei tokante e ‘jobcentrum’ ku lo lanta na Boneiru bou di e nòmber ‘Plenchi di Trabou’. Den kuadro di e programa Bes(t) 4 Kids, nan lo bishitá e akohida pa mucha ‘Hardin Tia Sus’ na Rincon.
Meta di e programa di mas aña ta pa realisá akohida pa mucha, preeskolar i póseskolar, aksesibel i di bon kalidat na Hulanda Karibense. Riba djasabra 5 di òktober, e delegashon ta bula bèk pa Hulanda Oropeo.