Posibilidat di komplemento èkstra pa persona ku penshun di AOV
RCN-Unit Asuntunan Sosial i Labor (SZW) a introdusí diferente medida pa oumentá yudansa finansiero. Asina for di promé di yanüari 2019 e primanan di por ehèmpel AOV, AWW i ònderstant a subi ku 5 porshento, riba inflashon.
Banda di esei for di promé di yanüari 2019 a introdusí un komplemento èkstra pa hende grandi soltero ku banda di nan penshun AOV no tin, òf tin tiki entrada adishonal. E komplemento èkstra ta disponibel tambe pa hende grandi kasá, si nan ta risibí AOV redusí. Esaki ta por ehèmpel si durante parti di nan bida laboral, nan a biba pafó di Hulanda Karibense. SZW a aserká e risibidó di AOV ku segun su datonan ta bini na remarke pa esaki, via pòst.
Personanan ku ta suponé ku nan ta bini na remarke pa e komplemento aki, pero ku no a risibí e karta ku formulario di aplikashon, por tuma kontakto ku RCN-unit SZW. Pa por risibí e komplemento retroaktivamente for di 1 di yanüari 2019, mester entregá e formularionan yená i firmá promé ku 1 di mart 2019 na SZW.