Kambio derecho di Aseguro di Kuido BES entrante promé di yanüari 2019
Ofisina di Aseguro BES (Zorgverzekeringskantoor BES, ZVK) ta informá ku entrante promé di yanüari 2019 tin kambio den algun parti di e Areglo di Derecho di Aseguro di Kuido BES.
Esaki ta relashoná ku kambio den pakete básiko di Lei di Aseguro di Kuido ku ta na vigor na Hulanda Oropeo.
Ta trata pa splika algun palabrashon i kondishon mas detayá pa algun stipulashon.
Loke ta i no ta paga
Ta splika por ehèmpel ku no ta paga investigashon di inkapasidat pa traha komo ta konsiderá esei komo kùrmentu médiko. No ta paga esei komo ku kùrmentu médiko no ta kai bou di kuido di dòkter di kas.
Loke sí ta paga ta sterilisashon di hòmber i muhé, preparado di dieta preskribí pa un dietista i terapia di ehersisio na COPD.
Ta kubri gastu di transporte di repatriashon di un defuntu entre e islanan Hulanda Karibense tambe.
Redukshon
A baha kontribushon propio pa sapatu ortopédiko i sapatu pa hende ku alergia. Asegurado di 16 aña i mas bieu ta paga 50$ pa aña kalendario, asegurado mas yòn ku 16 aña ta paga 25$ pa aña kalendario.
Ampliashon
Pa transporte di hende malu ku transportá sintá, ke men transporte ku no ta ku ambulans, a amplia e derecho: ta paga transporte tambe pa pashènt ku tin kanser i pashènt di nir pa konsulta, investigashon i kontròl.
Informashon
E buki di informashon ‘Ken ta sigurá na ZVK? Kiko aseguro di kuido ta paga?’ ta duna un resúmen di derecho di asegurado di ZVK.
Por haña informashon detayá tokante aseguro di kuido i e derechonan di kuido ku ta bálido a base di e Areglo Derecho Aseguro di Kuido BES, riba e website bou di Derecho di Kuido.’