Oumento di preis di konsumidó na Saba despues di Irma, a pasa
Den e di kuater kuartal di 2018 e preisnan di konsumidó na Saba tabata riba e mesun nivel ku un aña promé. Den e di tres kuartal konsumidónan na Saba ainda tabata paga 4.4 porshento mas pa produkto i servisio ku un aña promé.
Na Boneiru e preisnan den e di kuater kuartal di 2018 tabata 3.4 porshento mas haltu ku un aña promé i na Sint Eustatius 1.1 porshento. Esaki CBS ta anunsiá a base di e índise di preis di konsumidó.
Den e di kuater kuartal di 2017, despues ku orkan Irma a pasa, hopi produkto i servisio na Saba a bira basta mas karu i despues tambe e nivel promedio di preis a sigui subi un tiki. Den e di kuater kuartal di 2018 e oumento aki a para. E preisnan di konsumidó a yega e nivel di mas abou di 2018 i a yega eksaktamente na e mes nivel ku un aña promé. Na 2018 na Saba preis di telefòn i internet a baha ku 13.0 porshento i kuminda a bira un promedio di 2.0 porshento mas barata. Produkto pa mantenshon i drechamentu di kas en kambio a bira 4.7 porshento mas karu i paña i sapatu tambe nan preis a subi.
Preis di konsumidó na Boneiru 3.4 porshento mas haltu
Na Boneiru den di kuater kuartal di 2018 kasnan di famia a paga 3.4 porshento mas pa produkto i servisio kompará ku un aña promé. Den e di tres kuartal esaki tabata 3.5 porshento. E nivel di preis promedio a subi ménos lihé pa motibu di e desaroyo di preis di gasolin. E desaroyo di preis di muebel i fruta fresku en kambio a sòru pa un efekto asendente riba e preisnan di konsumidó. Fruta tabata 4.4 porshento mas karu ku un aña promé.
Berdura mas barata na Sint Eustatius
Den e di kuater kuartal di 2018 e preisnan di produkto i servisio na Sint Eustatius tabata 1.1 porshento mas haltu ku un aña promé, mes tantu ku den e di tres kuartal. Preis di paña i sapatu a subi i tambe batata a trese un efekto asendente riba e preisnan di konsumidó. Batata a bira 13.3 porshento mas karu na 2018. Preis di bèrdura fresku a baha ku 9.6 porshento i esaki a frena e desaroyo di preis.
E desaroyo di preis promedio na 2018
Henter 2018 e nivel di preis promedio na Boneiru tabata 3.4 porshento mas haltu ku na 2017. Na Saba e preisnan tabata 2.6 porshento mas haltu. E preisnan promedio di konsumidó na 2018 a subi di mas poko na Sint Eustatius, 1.3 porshento.
Sifra provishonal
E sifranan di e di kuater kuartal di 2018 i di aña 2018 ta provishonal i lo establesé nan definitivamente den e publikashon di e promé kuartal di 2019.
Fuente:
StatLine: Hulanda Karibense