ZVK a redusí lista di espera pa MRI-skan na sero

Ofisina di Kuido Médiko BES (ZVK) a eliminá e lista di espera pa MRI-skan na Boneiru den 4 siman. Tabatin 120 asegurado riba e lista debí ku e skan na Aruba a daña. Pa un solushon temporal, ZVK a aserká Clínica Iberoamérica na Baranquilla, Colombia. 

ZVK Sarpa

Pa e buelonan ZVK ta charter avionnan di Sarpa.

Na kuminsamentu di yüni último, e lista pa MRI-skan na Boneiru a oumentá te na 120 asegurado. A evaluá un tèst pa transporte médiko pa Clínica Iberoamérica positivamente. Seguidamente den e di tres siman di yüni a kuminsá baha e retraso ku 1 pa 2 vuelo pa siman.

30 Ora

Aseguradonan a reakshoná positivamente i ta eksperensiá e biahe médiko komo bon kuido, sigur i konfortabel. E biahe médiko pa bai i bini bèk ta dura aproksimadamente 30 ora (salida 9 or di mainta, regresá 2:30 di atardi e siguiente dia). E estadia ta den un hotèl banda di Clínica Iberoamérica. Pa e buelonan ZVK ta charter avionnan di Sarpa ku tin un kapasidat di 20 pa 22 pasahero. 

E vuelo ta dura alrededor di 1 ora i 40 minüt. Sarpa tin un enfermera na bordo i tambe tin un trahadó di ZVK pa guia práktiko. E MRI-skan ta kuminsá direktamente despues di yegada na hotèl. Ta guia aseguradonan pa i for di e klínika. Aseguradonan por warda den tur trankilidat den kamber di hotèl òf den lòbi. Tin televishon i wifi disponibel i aseguradonan ta risibí desayuno, almuerso i sena.  

Kalidat

Den 2019 ZVK a haña e tarea pa revisá gastunan di forma krítiko, manteniendo  e kalidat di kuido i kaminda por mehorá esaki. E solushon ku a haña pa aseguradonan di Boneiru pa ku MRI-skan, a resultá di ta di bon kalidat i asta ta kosta ménos. ZVK ta satisfecho ku esaki.