Programa BES(t) 4 kids a kuminsá bon
E ambishon di ‘BES(t) 4 kids’ ta pa na 2022 brinda akohida pa mucha i akohida despues di skol di bon kalidat, seif i aksesibel pa tur mucha na Hulanda Karibense. Desde komienso di e programa na yanüari 2019 a traha duru pa realisá e metanan.
Na Saba a amplia e kantidat di lokalnan di klas i a kontratá un kantidat di kolaboradó èkstra di manera ku mas mucha na Saba por hasi uso di akohida pa mucha i akohida despues di skol. Dor di esei e lista di espera di akohida pa mucha a bira mas kòrtiku.
Tur kolaboradó a sigui un introdukshon pa e programa pedagógiko High Scope. E método edukativo akí ta dirigí su mes riba desaroyo amplio di muchanan di 0 te 6 aña. Riba 24 i 25 di yüni 2019 tur kolaboradó di akohida ta haña entrenamentu tambe den e programa ‘Conscious Discipline’. E programa akí ta dirigí riba fortifikashon di e abilidatnan sosial emoshonal di muchanan. Na sèptèmber 2019 un promé grupo di 14 kolaboradó na Saba Comprehensive School ta kuminsá ku e kurso ‘CVQ 2 Early Childhood Development’.
Sint Eustatius
Sint Eustatius a start na febrüari 2019 ku e kurso `CVQ 2 Early Childhood Development’, na Gwendoline van Putten School. Ocho kolaboradó di e akohida pa mucha i diesdos studiante di e skol ta sigui e trayekto akí di dos aña. Nan ta siña kon muchanan hóben ta desaroyá nan mes i kon nan por apoyá muchanan den esei. Na yüli 2019 dos kolaboradó di akohida pa mucha i akohida despues di skol ta kuminsá ku un kurso pa bira trainer pa e programa pedagógiko High Scope. Ta duna entrenamentu tambe na e timnan di management di e organisashonnan di akohida i a lanta un plataforma den kua e organisashonnan di akohida ta diskutí konhuntamente asuntunan di kontenido i organisatorio i ta koordiná esakinan ku otro. Mas aleu e krèshnan ta traha riba ampliashon di kamber pa bebi. Na sèptèmber e renobashon lo ta finalisá. E ora ei lo tin mas espasio pa bebi i tin mihó fasilidatnan pa nan kuido.
Boneiru
Na Boneiru a train diferente grupo di kolaboradó den e programa pedagógiko Kaleidoscoop. Na ougùstùs 2019 ta start un kurso di ‘train-de-trainer’ pa personanan riba nivel di HBO i ku re-sertifikashon di kolaboradónan ku den pasado a logra nan sertifikado di Kaleidoscoop. Riba 6 di yüni 2019 a tuma lugá un enkuentro pa organisashonnan di akohida pa mucha i enseñansa. A papia tokante e oportunidatnan ku trahamentu ku Kaleidoscoop ta brinda na muchanan i kiko e programa por nifiká pa por tin un salida fuerte na skol básiko. Na Boneiru a kuminsá na amplia e kantidat di lugánan pa mucha supsidiá i a hisa e límitenan di entrada. Pa e motibu ei mas mayor por hasi hasi uso di akohida pa mucha i akohida despues di skol.
Pa realisá tur esakinan, e entidatnan públiko a nombra lidernan di proyekto ‘BES(t) 4 kids’. Pa Boneiru esaki ta Tamara Nicolaas, na Sint Eustatius a nombra Angela Dekker i na Saba Rosalyn Johnson. Fleur Lagcher tin e papel di manager koordinadó di programa. E entidatnan públiko i Gobièrnu Sentral (e ministerionan di SZW, OCW, VWS i BZK) ta traha estrecho ku otro den e programa ‘BES(t) 4 kids’. E representantenan ofisial ta bini huntu di 19 te ku 21 di yüni 2019 na Sint Eustatius pa den un reunion di trabou diskutí ku otro e pasonan (siguiente).