500 Kas di hür sosial riba Boneiru

Notisia | 27-06-2019 | 22:17

E meta di e kombenio aki ta realisashon di un koperashon rondó di e konstrukshon di e 500 kasnan di hür sosial riba Boneiru.

Sekretario di Estado Raymond Knops ta mustra satisfecho: “E firmamentu di e kombenio awe ta un bunita ehèmpel di un koperashon intensivo entre e partidonan konserní manera palabrá den e Akuerdo intergubernamental Boneiru. Hustamente tambe pasobra e ta sali for di e prioridatnan aportá dor di Boneiru mes i ku ta na benefisio di e habitantenan di Boneiru. Pasobra ta pa nan nos ta hasi esaki.” 

E kombenio aki ta duna un empuhe na e tareanan riba e tereno di bibienda sosial na Boneiru pa e añanan benidero. Den e kombenio e partidonan konserní ta hasi palabrashonnan fiho tokante e realisashon di e 500 kasnan di hür sosial. Asina FCB ta finansiá e konstrukshon di e 500 kasnan di hür sosial. OLB ta responsabel den esaki pa entre otro e pagamentu di e infrastruktura nesesario pa e proyekto di konstrukshon nobo (kayanan, awa i elektrisidat) i ta hasi e terenonan di èrfpagt disponibel. Reino ta kontribuí ku 2.5 mion euro for di e ‘Regio Envelop’ pa e infrastruktura nesesario. Tambe Reino ta tuma kargo di e supsidio di hürmentu pa FCB for di Entidat Públiko; OLB lo gasta e medionan ku ta bira liber dor di esaki na e infrastruktura nesesario tambe.

E proyekto di konstrukshon nobo

FCB despues di hopi aña di esfuerso intensivo a sòru pa e finansiamentu kompleto di e 500 kasnan di hür, pa un suma di 35 mion dòler. Durante e shete (7) añanan benidero lo konstruí e proyekto den fase. RBC Bank ta finansiá e promé fase di 76 kas na Nieuw Amsterdam pa 4.5 mion dòler i e sobrá 424 kas pa 23 mion dòler ta finansiá pa medio di un konsorsio formá dor di Vidanova Bank, Vidanova Pension Fund, Foundation Pension Fund Curaçao i Pensioenfonds Caribisch Nederland (PCN) di Boneiru. Banda di esei FCB tin un kontribushon propio di kasi 6 mion dòler.    

Ku orguyo Ben Oleana, direktor-gerente di FCB ta indiká: “Nos lema “Building Together” ta pará pa konstruí konhuntamente riba bibienda na Boneiru. FCB ta konsiente ku nos no por alkansá nos mishon nos so. Pa e motibu aki nos ta invertí den un bon relashon ku esnan direktamente konserní i ku partnernan di kadena manera OLB, Reino i instansianan sosial pa por ehekutá e tareanan prinsipal di FCB di un bon manera i den un forma komprometé i dirigí riba resultado. Kos ta fihá awor. Nos fundashon ta karga e gastunan di konstrukshon kaminda OLB lo sòru pa e kavelnan di konstrukshon nesesario. Pa loke ta trata e infrastruktura a forma un komishon infrastruktura riba inisiativa di FCB i Directie Ruimte en Ontwikkeling (R&O, Direktorado di Planifikashon i Desaroyo) pa negoshá e gastunan di infrastruktura kaminda lo duna konseho na e Kolegio Ehekutivo di OLB. E medionan pa esaki pa gran parti ta bin direktamente i indirektamente for di Reino (dor di e tumamentu di kargo di e supsidio di hürmentu). Tantu pa e hürdónan di FCB komo e hürdónan riba e merkado privá esaki lo sòru pa mas balansa den e relashon di preis i kalidat. Huntu nos ta pará fuerte i e proyekto kompleto ta un realidat.”  

Konstrukshon di kas sosial parti di Akuerdo intergubernamental Boneiru

Den e Akuerdo intergubernamental Boneiru (novèmber 2018) a palabrá ku Reino, OLB i e fundashon di kas boneriano FCB lo hasi palabrashonnan mas detayá tokante e finansiamentu total di e proyekto 500 kas di hür sosial riba Boneiru. Tambe e introdukshon di e lei- i regulashon merkado di kas di hür nobo por fin ta bira realidat. E kombenio bibienda públiko Boneiru ta duna kontenido na e palabrashonnan aki den e Akuerdo intergubernamental. E mènedjer di programa di e Akuerdo intergubernamental, Danny Royer, tambe tabata invitá dor di e BC di Boneiru pa ta presente na e firmamentu na Sint Eustatius. Ku e firmamentu di e kombenio a hasi un paso visibel importante den e ehekushon di e Akuerdo intergubernamental.  

“Awe ta marka un dia spesial i bunita pa Boneiru. Ta yuda 500 famia den añanan benidero na kasnan di hür pagabel, loke lo kondusí pa nan tur na sirkunstansianan di bida konsiderablemente mas mihó. Hopi di e famianan aki ta anhelá esaki añanan kaba. E kombenio ku nos a firma awe ta demostrá kua asuntunan signifikante nos por regla pa e komunidat boneriano dor di traha huntu den un bon forma. Tres partido kada un for di su propio responsabilidat a kontribuí na esaki. E Kolegio Ehekutivo ta hopi agradesido na Reino den persona di Sekretario di Estado Knops pa e disposishon pa atendé e dosié aki konhuntamente i pa kofinansiá e finansiamentu nesesario. Komo Entidat Públiko Boneiru nos no por a karga e gastunan di esei nos so. Tambe nos ta hopi impreshoná dor di e ròl ku FCB a hunga. Direktor Ben Oleana i su tim ta meresé un gran kòmplimènt pa nan perseveransia i resultado lográ. Nos ta spera ku e koperashon aki ta un ehèmpel pa kon Reino i Entidat Públiko Boneiru por konhuntamente realisá otro proyektonan urgente di e Akuerdo intergubernamental tambe”, segun un diputado orguyoso di Boneiru, Elvis Tjin Asjoe.