Gabinete Hulandes ta stipulá punto di referensia pa mínimo sosial na Hulanda Karibense

E suma proyektá pa personanan ku ta biba nan so ta stipulá na mas o ménos 945 dòler pa luna na Boneiru, 1.056 dòler na Sint Eustatius i 1.077 dòler na Saba. Pa yega na e suma aki,  entrada di abitantenan di Hulanda Karibense mester subi i e kosto di bida mester baha. Gabinete Hulandes a kuminsá ku esaki aña pasá.  E promé medidanan ya ta implementá.  Na e mes momentu e reto ta keda grandi pa fiha un sosial mínimo. Esaki Sekretario di Estado Tamara van Ark di asuntu Sosial i di Labor (SZW) ta skibi den un karta na Tweede Kamer. Van Ark ta anunsiá den su karta ku na 2020 suèldu mínimo i kompensashon pa yu ta sigui subi. 

Sekretario di Estado Van Ark huntu ku Sekretario di Estado Knops  di Ministerio di Asuntu Interior i Relashon den Reino (BZK) a reuní na Sint Eustatius ku Entidatnan Publiko di e islanan tokante di e medidanan nesesario pa sòru pa entrada i kosto di bida ta mas den balanse pa asina traha pa yega na mínimo sosial. 

Van Ark: "Esaki ta un paso importante pa mehorá situashon di e habitante di e islanan. Tin pobresa i bida ta karu.  Nos ta bai atendé esaki ku medidanan nobo i dirigí. Algun medida por implementá di forma rápido, otronan lo tuma mas tempu. Den hinter Gabinete Hulandes tin e boluntat pa dal e pasonan nesesario pa krese i yega na un mínimo sosial.  Esaki ta un desafio tambe pa gobernantenan di Boneiru, Saba i Sint Eustatius."

Subida di entrada i benefisionan sosial. 

Den e akuerdo di gobernashon Gabinete Hulandes a indiká ku e prioridat ta riba mehorashon di e perspektiva ekonómiko, dor di entre otro mehorashon di e infrastruktura i bahada di pobresa.   Aña pasá Ministerio di Asuntu Sosial i di Labor a anunsiá e promé pakete di medida dor di subi e suèldu mínimo stipulá pa lei, subida di kompensashon pa yu i subida di ònderstant pa hende ku ta biba nan so. A subi esakinan entrante promé di yanüari 2019. E prima di dunadó di trabou a baha for di promé di yanüari 2019 i esaki a krea espasio pa subi suèldunan di trahadónan. 
For di e aña aki tambe mas hende ta bini na remarke pa haña ònderstant speshal. Tambe a anunsiá medidanan pa hendenan ku no por traha por benefisiá di dje.  

Entrante promé di yanüari  2020 e ònderstant pa hendenan ku no por traha ta subi i entrante promé di yanüari ta subi via di ònderstant e kompensashon pa hendenan ku ta biba nan so i tin derecho riba AOV.

Banda di esei ta tumando pasonan pa subi kalidat di krèsh i akohida despues di skol i pa mehorá aksesibilidat. Tambe ta traha riba ponementu di hende na trabou. 

Ku medida nobo Gabinete Hulandes ke laga entrada di esunnan ku ta traha i esunnan ku tin yu sigui subi pa yega na e punto di referensia. P’esei entrante promé di yanüari 2020 SZW ta subi suèldu mínimo ku 5 porshento na  Boneiru i Saba i ku 2 porshento na Sint Eustatius. Benefisio sosial tambe ta subi ku esaki. Mayornan ku yu atrobe ta haña mas kompensashon pa yu despues ku e aña aki esaki ya a subi ku 50%. Entrante otro aña esaki ta subi ku mas o ménos 20 dòler mas pa kaba yu pa luna, un subida di 17,50 dòler riba e subida di 2,50 dòler ku ya a keda anunsiá. Na 2020 mayornan na Boneiru ta haña mas o ménos 82 dòler pa kada yu pa luna i na  Sint Eustatius i Saba  esaki ta bira 84 dòler pa luna pa kada yu. 

Bahada di kosto di bida

E kosto di gastunan básiko di bida awor aki ta muchu haltu pa hopi hende na Hulanda Karibense. Mester baha e gastunan aki na un nivel rasonabel pa asina e punto di referensia (ijkpunt) ta sufisiente pa kubri e nesesidatnan básiko di kosto di bida. Esaki ta konta por ehèmpel pa kosto di bibienda i krèsh.  E kompromiso di Gabinete Hulandes ta pa baha e gastunan struktural. Pa e gastunan di bibienda esaki ta nifiká un ampliashon nesesario di loke tin disponibel di bibienda sosial pa hür i regulashon di preisnan di hür.  

E Ministerio di BZK ta tumando pasonan den esaki. Ministerio di I&W ta pone supsidio disponibel pa preis di awa di bebe keda na un preis pagabel. E Ministerio di EZK  na e momentu aki ta evaluá e lei i reglanan di telekomunikashon pa mehorá servisio i baha kosto.    Gabinete Hulandes huntu ku e islanan a kuminsá un programa di mas aña pa hasi  krèsh i akohida despues di skol aksesibel pa tur mayor i pa mehorá e kalidat. 

For di 2020 tin anualmente 9,8 mion euro disponibel pa esaki. Ministerionan di SZW, OCW i VWS konhuntamente ta pone e suma aki disponibel. 
Van Ark: ‘ Kosto di bida ta diferente na kada isla. P’esei durante konsulta intergubernamental nos a puntra representantenan di  Boneiru, Saba i Sint Eustatius si a nombra e gastunan básiko korekto i kiko ta e mihó manera pa baha esakinan. Huntu nos ke haña e mihó solushonnan pa baha e kosto di bida i subi entrada.