Saba Package ta regla kolaborashon dirigí entre Reino i Saba
Awe diputado Zagers (Entidat Públiko Saba) i Sekretario di Estado Knops (Asuntunan Interno i Relashonnan den Reino) a firma e asina yamá ‘Saba Package’. E akuerdo di gobernashon aki ta dirigí riba kontinuashon i ankramentu di e bon kolaborashon entre Reino i Entidat Públiko Saba. E ‘Saba Package’ ta sòru pa un aserkamentu mas dirigí riba e reto i oportunidatnan ku tin na Saba, ku Reino i Entidat Públiko Saba ta traha huntu riba nan.
Sekretario di Estado Knops ta satisfecho ku e akuerdo intergubernamental. ‘E ‘Saba Package’ ta konektá bon ku e aserkamentu ‘more for more’ ku mi ta para p’e. E ta trata di durabilidat i kolaborashon práktiko riba tereno di desaroyo sosial i ekonómiko, bon gobernashon, órden i seguridat públiko. Habitantenan di Saba ta benefisiá direktamente for di dje. I mi ta aploudí esaki.
Diputado Zagers: ‘Firmamentu di e ‘Saba Package’ ta un bon ehèmpel di bon kolaborashon entre gobièrnu lokal i gobièrnu di Reino. Debí na nos gobièrnu stabil i maneho finansiero sólido, nos por a negoshá tokante un pakete asina ku ta suministrá un enfoke diferente pa Saba riba diferente tereno ku direktamente ta afektá nos isla i habitantenan. Kreashon di un pakete asina tabata kompliká, pero ámbos parti tabatin e deseo pa realisá e dokumento aki. A hasi hopi kos despues ku a kuminsá ku e pakete aki. Nos ta gradesido pa e funshon kordinante di BZK i e ministerionan ku ta afiliá na e diferente inisiativanan. Awor mester poné den práktika. Mi ta mira ‘quick wins’ i temanan ku ta riba mesa pa algun tempu kaba. Den eseinan mester bini avanse. Mi ta positivo tokante futuro pasonan konhunto. Saba i e ministerionan a demonstrá anteriormente ku kolaborashon konhunto ta trese bon resultado pa e isla.’
E akuerdo intergubernamental tei a petishon di Saba i ta skirbí konhuntamente ku e Ministerio di Asuntunan Interno i Relashonnan di Reino (BZK), kaminda e ministerio di BZK a sòru pa sinkronisashon ku e departamentonan na Den Haag.
E ‘Saba Package’ ta kana te ku 2022 i ta inkluí un agènda di implementashon ku ta kana di yanüari pa desèmber 2019. Akiden a hasi palabrashonnan konkreto pa e aña aki. Tur aña ta aktualisá e agènda di implementashon den konsulta ku Saba i Reino, ta fih’é pa e aña benidero. Asina e meta i prioridatnan ta kla i aktual, kaminda ta deskribí tarea- i responsabilidatnan pa kada ministerio. BZK ta kordiná e proseso aki i ta hasi esaki den bon kolaborashon ku Entidat Públiko Saba.
Aki mei aña e siguiente rapòrt di desaroyo lo sigui.