Sèn èkstra pa mehorashon di krèsh na Hulanda Karibense
Entrante otro aña gabinete Hulandes lo reservá mas sèn pa mehorashon di krèsh i akohida despues di skol pa muchanan na Hulanda Karibense. For di 2020 tin anualmente 9,8 mion euro disponibel pa esaki. Ku e sèn aki e kontribushon di mayornan por baha i tin mas sèn pa (re-)eduká lidernan di krèsh i akohida despues di skol. E ministerionan SZW, OCW, VWS i BZK ta kontribuí pa fortifiká krèshnan na e islanan den koperashon ku Entidatnan Públiko di Boneiru, Saba i Sint Eustatius.
E punto di salida di e plan di mas aña di e programa Bes(t) 4 Kids ta ku tur mucha di Hulanda Karibense di e edat di 0 pa 12 aña por hasi uso di e posibilidat di krèsh i akohida despues di skol. E aksesibilidat finansiero ta un kondishon importante. Na e momentunan aki krèsh ta karu na e islanan. Dor di esaki tin mayornan ku no por karga e kostonan di krèsh i akohida despues di skol. Banda di esaki e kantidat di muchanan ku ta na riesgo di tin un retraso den desaroyo i/òf pa siña ta grandi. Dor di invertí den kalidat, baha e gastunan pa akohida i sòru pa edukashon pre-eskolar ta un parti struktural na krèsh, Gabinete Hulandes ke stimulá mas mucha por desaroyá i pa mas mayor bai traha.
Sekretario di Estado Tamara van Ark (SZW), responsabel pa akohida despues di skol i krèsh: “Tur mayor na Hulanda Karibense mester por hasi uso di akohida despues di skol i krèshnan bon, sigur i aksesibel. Huntu nos ta pone nos skoudernan bou di e proyekto aki pa por logra. Asina nos ta traha riba futuro di e islanan, atendé ku pobresa i soro pa nos muchanan tin un mihó komienso.”
Banda di mihó aksesibilidat ta bini tambe eksigensianan di kalidat pa e fasilidatnan, bon supervishon riba esaki i ta invertí den kurso i edukashon di e lidernan. Gabinete Hulandes ke mehorá tambe e konekshon entre krèsh i edukashon primario. Konsiderando e grupo relativamente grandi i muchanan ku tin nesesidat pa haña sosten i/òf kuido e koperashon ku instansianan di kuido ta un otro punto di atenshon importante.
E impulso ku ta duna krèsh i akohidanan despues di skol ta kontribuí na e kompromiso ku Gabinete Hulandes tin pa mehorá e kalidat di bida di e abitantenan di Hulanda Karibense di forma integral. Den e periodo binidero lo sigui traha huntu ku entidatnan públiko di Boneiru, Saba i Sint Eustatius pa duna mas kontenido na e programa Bes(t) 4 Kids.