Èksamen Spañó vmbo ta keda bálido pa Sint Eustatius
Despues di deliberashon ku DUO (Dienst Uitvoering Onderwijs), ministerio di OCW (Enseñansa, Siensia i Kultura), CITO i CvTE, (College voor Toetsen en Examens) Inspekshon di Enseñansa na Hulanda a disidí ku e èksamen Spañó nashonal di vsbo, kua a tuma lugá dia 22 di mei, lo keda bálido pa Sint Eustatius.
Na un di e skolnan pa enseñansa sekundario na Sint Maarten, e èksamen nashonal di vsbo pa Spañó, a tuma lugá riba dia 21 di mei, un dia promé ku e fecha stipulá. Na e otro skolnan pa enseñansa sekundario di vsbo i vmbo (ekivalente na vsbo) na Sint Maarten i Hulanda Karibense si e èksamen aki a tuma lugá dia 22 di mei.
Komo konsekuensha di e echo aki, Inspekshon di Enseñansa di Sint Maarten a deklará e èksamen final nashonal di vsbo/vmbo pa Spañó inbálido. Esaki ke men ku tur kandidato pa e èksamen final di vsbo na Sint Maarten lo mester traha e èksamen di nobo durante e di dos periodo di eksaminashon, na yüni benidero.
Análisis
Inspekshon di Enseñansa Hulandes a hasi un investigashon den kolaborashon ku DUO pa haña sa si e kandidatonan na Sint Eustatius por tabatin konosementu anterior di kontenido di e èksamen. E análisis di DUO a demonstrá ku no tin motibu pa suponé ku e alumnonan na Sint Eustatius tabatin konosementu anterior di algun manera. Den e kontestanan di e tareanan no tabatin patronchi ku ta mustra den e direkshon ei.
Pa e motibu ei Inspekshon di Enseñansa a disidí pa no deklará e èksamen vmbo (red.: ekivalente na vsbo) na Gwendoline van Putten School naSint Eustatius inbálido. E College voor Toetsen en Examens (CvTE) a informa e skolnan sekundario na Hulanda Karibense i e ofisinanan di èksamen di Aruba, Kòrsou i Sint Maarten tokante di e desishon aki.