Wes ta bai di akuerdo ku repatriashon den fase
No tin mester di trese diesshete habitante di Boneiru ku a keda pegá den eksterior i ku a entamá un kaso den korte kontra Entidat Públiko Boneiru (OLB, Openbaar Lichaam Bonaire), bèk Boneiru inmediatamente. Esaki wes riba 9 di aprel a disidí den su sentensia. Esaki ke men ku Gezaghèber por kontinuá e repatriashon den fase.
Aktualmente tin mas o ménos 245 residente di Boneiru pegá den eksterior komo konsekuensha di e medidanan ku a tuma pa motibu di e vírùs di Corona i su impakto rònt mundu. Wes ta haña ku OLB a prueba sufisientemente ku no tur residente por regresá Boneiru pareu. Pa motibu di e kapasidat di kuido limitá esaki na Boneiru aktualmente ta trese muchu riesgo. P’esei wes ta pèrmití ku OLB for di 14 di aprel 2020 lo trese esnan ku ta repatriá kas bèk den fase di grupo di maksimalmente 50 persona kada bia.
Ora a amplia e kapasidat di kuido na e isla i a haña eksperensia ku e promé grupo di persona ku a repatriá, esaki segun wes lo por ta motibu pa oumentá e kantidat di hende ku ta repatriá kada bia, pa asina esnan ku ta repatriá por regresá mas promé. P’esei wes ke pa OLB dun’é informashon fin di aprel 2020 tokante e último situashon médiko.
Kuminsá repatriashon
For di EBT i e taskforce ku ta traha riba e guion (draaiboek) di repatriashon, lo hasi tur kos posibel pa laga e regreso di e residentenan tuma lugá despues di Pasku di Resurekshon na un manera seif i responsabel. Gezaghèber ta pidi tur residente di Boneiru pa laga e repatriashon den man di eksperto. E médikonan i Salubridat Públiko ta hasi tur preparashon nesesario pa repatriashon. Supervishon i mantenshon ta bou di guia di e kadena di seguridat. Ekspertonan logístiko lo sòru pa transporte i estadia. Na nivel di gobièrnu lo evaluá e konseho di ekspertonan i lo inkluí esaki den e tumamentu di desishon.
Gezaghèber Edison Rijna: “Atrobe mi ta hasi un apelashon pa demonstrá union. E apelashon aki ta konta pa tur residente, aki i den eksterior. E repatriashon ta toka habitante di tur gremio di nos komunidat. Nan tin derechi di regresá. Bo por konfia ku lo tuma kada desishon den esaki deliberadamente i kontinuamente ta hasi esfuerso pa laga e repatriashon sosodé di forma responsabel.”