Aparato i remedi pa 6 lugá mobil di kuido intensivo na Boneiru
Ekipo di respirashon, remedi i material di protekshon pa kuido di pashèntnan di Corona vírùs djasabra 11 di aprel a yega for di Hulanda na Aeropuerto Flamingo. Ku esaki hospital Mariadal por instalá téknikamente 6 espasio di respirashon pa kuido intensivo. Tambe awor tin remedi i artíkulonan di protekshon na Boneiru ku ta nesesario pa bai duna e kuido nesesario na e momento ku un promé infekshon di Corona presentá.
Pa e fortifikashon kompleto di e kapasidat médiko mester di mas personal médiko. Tokante di esaki ministerio di VWS ta hasi palabrashon ku un kompania internashonal ku ta transportá personal médiko. E promé tim di personal médiko i enfermeronan ku di e forma aki a pone disponibel a kuminsá traha e siman aki na Sint Maarten. Personal médiko èkstra pa Boneiru lo sigui, komo yudansa adushonal pa e tim di médiko ku a bini for di Colombia i Amsterdam.
Gezaghèber Edison Rijna: “Esakinan ta pasonan importante pa pèrkurá pa nos ta prepará pa e vírùs Corona na Boneiru. Ounke ainda nos no a deskubrí infekshon, un dia esaki tambe lo yega Boneiru. P’esei mi ta pidi tur hende na Boneiru pa tene boso na tur medida preventivo. Aparte di 1.5 meter di distansha sosial i e reglanan di higiena ku bo mes tene bo mes ne, tambe e medidanan di e ordenansa di emergensia ta keda na vigor. Huntu nos mester pèrkurá pa nos keda dominá Corona. Huntu kontra Corona!”