SZW ya a paga mil aplikashon pa areglo di emergensia
Desde ku e areglo di emergensia di SZW a drenta na vigor na komienso di e luna aki, a risibí aplikashon pa mas di dos mil persona na Boneiru, Saba i Sint Eustatius. Ya a paga mitar di esakinan. Pa hasi esaki posibel, kolaboradónan di unidat SZW di RCN a traha durante wikènt di Pasku di resurekshon último.
E areglo temporal ta bálido pa un periodo di tres luna i ta retroaktivo for di 13 di mart 2020. Pa por bini na remarke pa e areglo, mester tin pèrdida di benta di por lo ménos binti porshento en konekshon ku vírùs di corona. Si otorgá e petishon, ta paga ochenta porshento di e salario di e empleado na e dunadó di trabou pa e oranan ku e empleado no por traha. Mester paga e empleado e montante aki komo salario.
E areglo ta konta tambe pa empleadonan ku un kontrakt di sero ora òf un kontrakt temporal. Empresarionan independiente ku a pèrdè entrada, por bini na remarke pa un suplemento te ku ochenta porshento di e salario mínimo legal. Personanan ku pa motibu di e vírùs di corona no tin dunadó di trabou mas, mes por mèldu na e unidat lokal di SZW pa entregá un petishon pa ayudo. Esaki por ta e kaso si no a prolongá nan kontrato òf si nan tabata den nan periodo di prueba. Nan por bini na remarke pa ochenta porshento di nan último salario.
Por mira mas informashon tokante e areglo di emergensia di SZW i e formularionan di aplikashon riba www.rijksdienstcn.com/covid-19.