Promé fase di repatriashon ta start riba 17 di aprel próksimo
E promé avion ku repatriante lo aterisá 17 di aprel próksimo. E grupo ta konsistí entre otro di residente ku funshon vital, residentenan di kua nan trato médiko na Hulanda a terminá, i algun profeshonal entre kua profeshonalnan ku ta bin fortifiká sektor médiko.
Riba e mesun dia ta yega tambe un avion for di Colombia ku residente di kua nan tratamentu a finalisá. Lo hiba e grupo kompleto den karentena sentral. E grupo ta konsistí di 44 persona te ku awor.
E promé grupo di repatriante lo forma base pa kontinuashon di e trayekto. Lo evaluá e transkurso di e karentena sentral, tambe lo evaluá durante e trayekto. Asina lo evaluá kua kantidat di repatriante ta alkansabel pa e kadena di kuido i akohida.
Apesar di e deseo pa repatriá rápidamente, ainda no por duna fecha pa e di dos grupo di repatriante. Ta dependé di desaroyonan riba e isla. E vírùs di corona ta difísil pa pronostiká i esei ta hasié un temporada insigur pa tur hende, kaminda tin ora mester adaptá lihé. En todo kaso e esfuersonan di EBT i ‘taskforce’ ta kompletamente dirigí riba repatriashon responsabel di e residentenan.