Statement gezaghèber Edison Rijna 31-3-2020

Notisia | 02-04-2020 | 22:15

E último buelo internashonal ku pasahero a baha dos siman pasá na Boneiru. E chèns ku tin e vírùs di corona ta na nos isla ta bira kada bes mas chikitu. Pero esei no ta nifiká ku e peliger a pasa. Lo yega un momentu ku e vírùs ta yega. Sientífikonan sa kon un epidemia di un vírùs ta desaroyá pero e vírùs di corona ta nobo i ta desafiá tur e reglanan aki. Ku esaki na mente mi ke pidi boso tuma e loke mi ta bai bisa seguidamente na konsiderashon:

Riba konseho di EBT nos a tuma medidanan preventivo na tempu. A sera tráfiko aéreo,  implementá medidanan di higiena i tambe distansia sosial. Screening ku karentena a bira parti di e prosedura na momentu ku pasaheronan yega nos isla. Tur e medidanan preventivo aki a tuma nan pa gana tempu. Tempu pa amplia e kapasidat den kuido. Tempu pa introdusí un orario di konsulta pa kehonan di respirashon. Pero tambe gana tempu pa prepará pa trese nos residentenan den eksterior bek Boneiru na un manera seif.

Mi ta komprondé ku ta difísil pa bo ta leu for di bo famia, i bo situashon familiar. Abo mi ke bisa ku nos ta hasiendo tur esfuerso pa trese boso kas bek na un manera responsabel i safe.

Nos ekonomia ta pará praktikamente ketu. Hende ta pèrdè trabou i tambe entrada. Den koperashon ku gobièrnu di Reino nos ta trahando duru pa hasi e impakto sosial ekonómiko mas chikitu posibel.

Den tur esaki abo komo siudadano tin un ròl importante. Si huntu nos sigui e reglanan bo ta yuda nos gana tempu. Hopi hende ta tene nan mes na e reglanan adishonal, pero esaki lamentablemente no ta konta pa tur hende. Ta bai atendé ku esunnan ku ta kere ku e reglanan aki no ta konta pa nan, pasobra nan ta salú òf pasobra nan no ta sigui e òrdu pa tene distansia sosial. Entidat Públiko Boneiru, Ministerio Públiko, Kuerpo Polisial i Korte a hasi palabrashon riba kon ta bai atendé ku e persona aki. I si ta nesesario lo atendé ku nan ku man fuerte.

Mi ta komprondé ku e situashon aki no leuk pasobra bo moveshon liber a keda limitá. Di un dia pa otro bo mester tene distansia di otronan na por ehèmpel bo snek preferí. Bo no por bai mas ku grupo grandi pa disfrutá di nos playanan i bo yu tin ku hasi lès na kas. E no ta fásil, pero ta hasi tur esaki ku un solo meta, esta pa protehá abo i tur siudadano di Boneiru kontra e vírus di corona. Mi ta hasi un yamada na kada un di boso pa koperá i uni den e kousa aki. Huntu nos ta logra. Huntu nos ta pone nos skouder bou di esaki. Huntu kontra corona.