Preis di konsumidó na Boneiru 1.0 porshento mas haltu den promé kuartal di 2020
Den e promé kuartal di 2020 produktonan i servisionan di konsumidó na Boneiru tabata 1,0 porshento mas karu ku un aña anterior. Na Sint Eustatius e preisnan pa aña a subi ku 1,2 porshento i na Saba ku 0,4 porshento. Esaki CBS ta raportá a base di e índise di preis di konsumidó Hulanda Karibense.
E subida di e preisnan pa produktonan i servisionan na Boneiru tabata mas abou ku den e di kuater kuartal di 2019 (2,2 porshento).
Elektrisidat i awa mas barata na Boneiru
E subida mas abou di e nivel di preis promedio pa produkto i servisio na Boneiru den e promé kuartal di 2020 tabata kousá prinsipalmente pa e desaroyo di preis di elektrisidat i awa. Elektrisidat e último kuartal tabata 14,1 porshento mas barata ku un aña anterior i awa 12,7 porshento. En kambio e preisnan di gasolin i disel a pusha e nivel di preis promedio na Boneiru bai ariba. Gasolin den e promé kuartal tabata kasi 20,8 porshento mas karu ku un aña anterior i disel mas ku 29 porshento.
E desaroyo di preis di bèrdura i fruta na Boneiru tambe tabatin un efekto asendente riba e preisnan di konsumidó. Fruta fresku den e promé kuartal di 2020 tabata 22,9 porshento mas karu ku un aña anterior. Kompará ku e di kuater kuartal di 2019 e preisnan di bèrdura si a baha ku 2,5 porshento i esnan di fruta ku 3,9 porshento.
Preisnan na Sint Eustatius 1,2 porshento mas haltu
Preisnan di konsumidó na Sint Eustatius den promé kuartal di 2020 tabata 1,2 porshento mas haltu ku un aña anterior. Den e di kuater kuartal di 2019 e subida tabata 1,0 porshento. E preis di elektrisidat tabata 1,6 porshento mas haltu ku un aña anterior. Tambe e preis pa buki, aparato di oudio i vidio i téket pa bula a subi.
E preis di mueble a baha kompará ku e di kuater kuartal di 2019 ku 3,4 porshento. Serka sapatu ta mira un bahada di 8,8 porshento kompará ku e di kuater kuartal di 2019.
Preisnan di konsumidó na Saba ta subi ménos lihé
Na Saba e konsumidónan den e promé kuartal di 2020 a paga un promedio di 0,4 porshento mas kompará ku un aña anterior. Den e di kuater kuartal di 2019 esaki tabata 0,8 porshento.
E preisnan di artíkulo di kuido personal den e promé kuartal tabata 9,0 porshento mas abou ku den e mésun kuartal aña pasá. E preisnan di buki, oudio i aparato di vidio tabata mas haltu ku un aña pasá.
Preis promedio di gasolin i disel na Hulanda Karibense, Aruba, Kòrsou i Sint Maarten
E preisnan pa gasolin i disel na Hulanda Karibense generalmente ta mas haltu ku na Aruba, Kòrsou i Sint Maarten. E diferensha di preis di mas grandi den e último diesdos lunanan entre Boneiru i Kòrsou tabata na febrüari 2020, ora un liter di gasolin tabata un promedio di 33,5 sèn di dòler mas karu na Boneiru. E diferensha di mas chikí tabata na mei 2019, ora ku na Boneiru mester a paga 4,2 sèn di dòler mas. Disel na Boneiru tabata algu mas barata ku na Aruba, pero na mayoria di e lunanan mas karu ku na Kòrsou. Na Sint Eustatius preis di un liter di disel ta e di mas haltu.
Serka e fuentenan na e notisia aki tin un lista di preis pa gasolin i disel ku a kompilá ku pèrmit di e ofisinanan di estadístika di Aruba, Kòrsou i Sint Maarten.
Sifra provishonal
E sifranan di e promé kuartal di 2020 ta provishonal i lo stipulá esakinan definitivamente den e publikashon di e di dos kuartal di 2020.
Fuente:
StatLine: Caribisch Nederland
https://opendata.cbs.nl/#/CBS/nl/dataset/84046NED/table?dl=BFA9
Tabèl: Preis promedio di gasolin i disel na Hulanda Karibense