A tèst 190 persona na COVID Drive-Thru
Via e COVID Drive-Thru na Boneiru a tèst 190 persona pa COVID-19 entre 14 i 21 di aprel último.
Na tur, pues inkluso e tèstnan via e COVID Drive-Thru, entretantu a tèst 228 persona na Boneiru: 190 via di e drive-thru i 38 via dòkter di kas. Entre e 190 personanan di tèst via e COVID Drive-Thru no tabatin ningun kaso positivo. Di e 38 personanan ku a tèst via dòkter di kas, tabatin 2 persona a tèst positivo riba COVID-19. E dos personanan aki mientrastantu a rekuperá i ta bon.
Tokante e dos personanan aki ya a komuniká anteriormente. Tabata trata aki di 1 persona ku su promé tèst a sali inkonkluso i despues di re-evaluashon i riba konseho di RIVM a disidí pa konsiderá e tèst aki komo positivo. E di dos persona a tèst positivo. Banda di esei tabatin un di tres persona ku resientemente a tèst negativo pero a tèst e di nobo. E resultado di e persona aki ainda ta pendiente.
Departamentu di Salubridat Públiko a lansa, huntu ku Fundashon Mariadal, e Drive-Thru di COVID riba 14 di aprel último. Meta di e COVID Drive-Thru tabata pa tèst un kantidat mas grandi di persona. Dor di esaki por atkirí mas konosementu tokante e sirkulashon di e vírùs di corona na Boneiru.
Pa por duna konseho riba e medidanan adekuá pa futuro serkano, tabata nesesario pa sa sigur si e vírùs di corona ta na Boneiru. A base di e tèstnan hasí den e simannan promé ku instalashon di e COVID Drive-Thru, no tabata sigur ainda si e vírùs ya a yega Boneiru.
Dor di e kantidat haltu di persona ku a tèst den e COVID Drive-Thru (190 persona ta kasi 1% di habitante di Boneiru), nos tin mas konfiansa ku e vírùs no ta sirkulá aktivamente na Boneiru, a pesar di e hecho ku a enkontrá dos kaso di e vírùs pafó di e COVID Drive-Thru.
Bentaha di COVID Drive-Thru
E bentaha di e COVID Drive-Thru ta ku por a provee un situashon di tèst seif i ku privasidat, kaminda hende por a mèldu nan mes dirèkt pa e tèst, tambe si tabatin kehonan leve di salú, segun Fundashon Mariadal.
E COVID Drive-Thru a habri riba djamars 14 di aprel i lo a keda habrí te ku djabièrnè 17 di aprel. A ekstendé esaki despues te ku djamars 21 di aprel. Riba djawebs i djabièrnè a tèst mas tantu hende. Tabata ehekutá e tèstnan riba petishon di dòkter di kas a base di un definishon di e kaso. E definishon di e kaso tabata: kentura i/òf tos i keho respiratorio den kombinashon ku un biahe pa un area di riesgo òf kontakto ku un pashènt di COVID-19.
E tim di test di Fundashon Mariadal i e Departamentu di Salubridat Públiko ta satisfecho ku e método di trabou i e reakshon for di komunidat.