Spich Gezaghèber 24-04-2020
Kerido pueblo,
Manera ya a anunsiá, nos ta den un fase nobo kaminda nos tin hende ku a tèst positivo pa e vírus di corona. Esaki ta pone tambe ku nos ta bai komuniká ku mas frekuensia riba e desaroyonan i e impakto ku e situashon aki tin riba kada un di nos.
Na promé lugá mi ke anunsiá sifranan te ku awe 24 di aprel 2020. Nos a tèst total 228 persona. Di kua 190 via di e Covid-drive Thru, 38 persona a tèst via di nan dòkter di kas. 1 persona a tèst inkonkluso i riba konseho di ekspertonan a registrá e persona aki komo positivo i un di dos persona a tèst positivo. E kaso ku a anunsiá djaluna último ku tabata pending, ta negativo. Pues no mester tuma niun medida adishonal. Pues no tin niun kaso positivo mas ku a bini aserka apesar di e echo ku a tèst hopi mas hende den e dianan tras di lomba.
Nos ta bai drenta atrobe den dianan di fiesta. Pa 31 aña riba 30 di aprel nos a selebrá e fiesta kultural mas grandi na nos isla, ku ta nos dia di Rincon. Pa promé biaha e aña aki e dia aki ta ofisialmente un dia liber. Lamentablemente e aña aki nos no por bini huntu pa e bunita evento aki. Pero laga kada un di nos tuma e inisiativa pa den nos seno familiar nos wapa i selebrá nos herensia kultural manteniendo nos mes na e reglanan di distansia sosial i no mas ku 50 hende huntu. Graba i kompartí bo selebrashon di dia di Rincon ku bo famia via medionan sosial pa asina tòg kada un di nos sinti e ambiente di e gran selebrashon aki.
Tambe durante di e dianan aki nos ta selebrá kumpleaño di nos Rei Willem Alexander i dia di Antriol. Laga nos para ketu tambe na e dos selebrashonnan aki. Den e momentu di krísis aki nos ta mira kiko ta e balor agregá di ta forma parti di Reino Hulandes, si tuma na konsiderashon tur e yudansa ku nos a i ta risibí for di Hulanda. Awe Sekretario di Estado Knops a anunsiá yudansa humanitario na esunnan ku mas mester di dje i tambe supsidio pa utilidatnan pa e próksimo lunanan aki pa Boneiru, Sint Eustatius i Saba. Un otro gesto bunita di parti di Hulanda ku ta demostrá atrobe ku nan no a lubidá riba nos.
Por último mi ke para ketu tambe na e fecha di promé di mei ku ta dia di labor. Hopi empresa i organisashon mester a hasi adaptashon den nan forma di atendé ku nan empleado i klientenan dor di e pandemia di e vírùs di corona. Laga kada empleado i empresario usa e momentu di krísis aki pa krea oportunidatnan nobo den nan karera i negoshi. Sigui por ehèmpel un kurso online ku lo por ta di balor agregá na bo trabou. Kuminsá ku bo yunan un hòbi nobo, toka músika i kushina huntu, tur ta aktividatnan ku por trese famianan mas serka di otro den e momentunan difísil aki.
Mi ta deseá hinter pueblo di Boneiru,
Felis dia di Rei, felis dia di Antriol, felis dia di Rincon i felis dia di labor.
Huntu kontra corona.