Mas forsa di kompra pa entradanan abou Sint Eustatius den 2018
Forsa di kompra den 2018 a bolbe subi pa Sint Eustatius. Promedio e poblashon a bai 2 porshento dilanti kompará ku 2017. Dor di un oumento èkstra di e suèldu mínimo legal i benefisionan sosial na Sint Eustatius den 2018, e forsa di kompra a subi partikularmente pa personanan den un kas di famia ku tiki entrada. E forsa di kompra pa habitantenan di Boneiru i Saba a baha kompará ku 2017. Esaki CBS ta informá a base di sifranan nobo.
Desde 2012 forsa di kompra na Sint Eustatius a subi anualmente. Ora e forsa di kompra oumentá, e entrada ta subi mas ku e nivel di preis promedio i por kumpra mas produkto i servisio. E kambio di forsa di kompra promedio di 2 porshento den 2018 ta nifiká ku mitar di e personanan a bai 2 porshento òf mas dilanti den forsa di kompra i ku e desaroyo serka e otro mitar a keda riba un nivel mas abou. Serka 44 porshento di e habitantenan e forsa di kompra a baha. Den 2018 habitantenan na Boneiru i Saba a haña nan mes konfrontá ku un pèrdida di forsa di kompra pa di promé bia desde 2012. Promedio e forsa di kompra a baha respektivamente ku 1,1 porshento i 0,3 porshento.
Gruponan di entrada mas abou Sint Eustatius ta probechá mas
Personanan den kasnan di famia ku e 25 porshento di entradanan mas abou na Sint Eustatius a bai mas dilanti den forsa di kompra ku promedio 3,4 porshento. Kontrali na Sint Eustatius e forsa di kompra na Boneiru a baha pa tur grupo di entrada. Personanan den e grupo di entrada mas abou a mira nan forsa di kompra baha mas tantu, esta ku 2,6 porshento. Tambe e trahadónan na Boneiru no a bai dilanti. Nan forsa di kompra a baha ku 0,5 porshento. Na Saba solamente personanan ku ta forma parti di e kasnan di famia den e dos gruponan di entrada mas haltu a probechá di un forsa di kompra ku a subi. Trahadónan na Saba a bai promedio 1 porshento dilanti.
Na Sint Eustatius tur tipo di kas di famia a probechá
Na Sint Eustatius e forsa di kompra a drecha promedio pa tur tipo di kas di famia. Personanan den kasnan di famia di un mayor a bai 3,5 porshento dilanti, personanan ku ta forma pareha ku i sin yu ku respektivamente 2,6 i 2,2 porshento. Na Bonaire i Saba (partikularmente) personanan den kasnan di famia ku yu a mira nan forsa di kompra subi. Solteronan i parehanan sin yu a bai promedio mas di 2 porshento atras.
Mas forsa di kompra pa hóben i grandi na Sint Eustatius
Na Sint Eustatius e forsa di kompra a subi pa tur grupo di edat. Partikularmente hendenan riba 60 aña a mira nan forsa di kompra mehorá ku 3 porshento, danki tambe na e AOV (seguro general di behes) ku a subi èkstra. Na Saba no a hisa e benefisionan sosial i na Boneiru solamente leve. Aki partikularmente e inflashon relativamente haltu a sòru ku grandinan a mira nan forsa di kompra redusí ku respektivamente 2,8 i 2,6 porshento.
Fuentenan:
StatLine - Caribisch NL; koopkrachtontwikkeling personen in particuliere huishoudens
https://opendata.cbs.nl/statline/#/CBS/nl/dataset/83551NED
Splikashon:
Desaroyo di forsa di kompra
Ta kalkulá e desaroyo di forsa di kompra di un persona komo e kambio prosentual aña tras aña di e entrada disponibel standarisá di kas di famia koregí na e kambio di preis. A klasifiká e kambionan prosentual aki di abou bai haltu i e balor meimei – òf e balor promedio òf balor mediano – ta ekspresá e kambio di forsa di kompra di e (sup)poblashon konserní. E forsa di kompra (dinámiko) por kambia pa hopi motibu. E entrada ta kambia por ehèmpel dor di un oumentu di suèldu, promoshon, aseptashon di (otro) trabou i penshun. Tambe kambionan den konstelashon di e kas di famia (un yu ta sali for di kas, partnernan ta bai for di otro) ta kondusí na un kambio den entrada. Den e desaroyo di forsa di kompra dinámiko ya a tene kuenta ku tur e kambionan aki.
Gruponan di entrada
A kalkulá pa persona e entrada promedio di e kas di famia disponibel standarisá pa 2017 i 2018. E repartishon di e gruponan di entrada kuartil ta basa riba e promedionan aki den 2017 i 2018. Di e forma ei pues ta koregí e promedio pa loke ta trata e kaida.
Oumento èkstra di benefisionan sosial
Pa mehorá siguridat di eksistensia i kombatí pobresa a indeksá na 2018 e suèldu mínimo legal i e benefisionan sosial manera AOV (seguro general di behes), AWW (lei general di biudo i wérfano) i Ònderstant (bijstand) na Hulanda Karibense a base di e sifra di índise di preis di konsumidó di e di 3 kuartal 2017 di CBS. Saba a mira un deflashon di 1,3 porshento, pa kua motibu no a hisa e benefisionan sosial i e suèldu mínimo legal. Pa Boneiru i Sint Eustatius a indeksá e benefisionan sosial i suèldu mínimo legal ku respektivamente 0,6 porshento i 2,1 porshento. Na mes momentu na Sint Eustatius tabatin un adaptashon èkstra di e suèldu mínimo legal pa ora i e benefisionan sosial AOV, AWW i ònderstant basá riba e bista kreá pa e statistik di entrada ku CBS a publiká. A hisa e benefisionan sosial èkstra ku 2,9 porshento, di manera ku e oumentu total tabata 5 porshento na Sint Eustatius.