Rei ta bishitá Ministerio di Salubridat Públiko, Bienestar i Deporte pa kordinashon di krísis di corona
Su mahestat Rei a hasi un bishitá di trabou riba djabièrnè atardi 3 di aprel na e Ministerio di Salubridat Públiko, Bienestar i Deporte (VWS) na Den Haag pa motibu di e ròl den e kordinashon di krísis pa motibu di e coronavirus (COVID-19).
Rei Willem-Alexander a kuminsá su bishita na e Direktorado Salubridat Públiko ku ta responsabel pa e organisashon di krísis ora ta trata brote di malesa di infekshon i desaster. Desde e promé brote di e coronavirus den Wuhan, China, na desèmber 2019 e direktorado ta atendé ku esaki. Komienso di febrüari a eskalá pa koperashon interdepartamental bou di e paraplü di e Nationaal Coördinator Terrorismebestrijding en Veiligheid (NCTV) (Kordinadó Nashonal di Kombatimentu di Terorismo i Siguridat (NCTV)). Rei a papia ku kolaboradónan di e tim di krísis tokante nan eksperensianan.
Despues Rei a bishitá e direktorado di Kuido Kurativo unda el a papia ku miembronan di e tim ku ta traha kontinuamente riba e eskalashon di e kapasidat di kuido intensivo i e kompra di ekipo di respirashon. Tambe el a papia ku kolaboradónan ku ta mantené kontaktonan ku e Sentro di Kordinashon Nashonal i Proliferashon di Pashènt (LCPS) na Rotterdam. E direktorado di Kuido di Largu Durashon a duna un bista di e programa pa personanan vulnerabel. E programa aki ta enfoká riba e garantia di sufisiente kapasidat di kuido pa e grupo di mas vulnerabel i e redukshon di e riesgo pa hendenan ku un salú suak. Ehèmpelnan di esaki ta e garantia di kapasidat den kuido i e sosten di inisiativanan sosial pa trese hende den kontakto ku otro. Serka e direktorado di Remedi i Teknologia Médiko a informá Rei tokante mantenshon di disponibilidat di remedi den e situashon di krísis aki.
Ademas Rei a tuma parti den e konferensia di video diario entre e tim di krísis di VWS Hulanda Karibense i e timnan na Boneiru i Sint Eustatius. E direktorado di programa Kuido i Hubentut Hulanda Karibense (ZJCN) ta responsabel pa e maneho, e organisashon i e ehekushon di kuido na Boneiru, Saba i Sint Eustatius. E direktorado ta duna sosten tambe na e paisnan Aruba, Kòrsou i Sint Maarten den nan aserkamentu di e krísis di corona.
A klousurá e bishita di trabou ku un kombersashon kòrtiku ku e mandatarionan di e Ministerio di VWS i e miembronan di e konseho ehekutivo.
Pa medio di yamadanan di telefòn i posiblemente bishitanan di trabou Rei Willem Alexander i Reina Máxima ta tene nan mes informá tokante e konsekuensianan di e brote di corona i ta deklará nan sosten i apresio pa e esfuersonan di tantu hende den e kombatimentu di e pandemia.
RVD, nr. 64