Diálogo Sentral: Huntu nos ta pasa dor di e krísis di corona

E partidonan den Diálogo Sentral a establesé dos grupo di trabou: unu ta enfoká riba e medidanan tumá pa gobièrnu pa aliviá e efektonan sosial-ekonómiko di e vírùs di corona. E otro ta konsentrá riba e periodo ku den bista di Salubridat Públiko ta responsabel pa re-aktivá ekonomia.

Centraal dialoog

Diálogo Sentral, e plataforma di konsulta di Kámara di Komèrsio, ROW, USIBO i gobièrnu lokal, bou di sirkunstansianan normal ta reuní 8 biaha pa aña. Debí na e impakto grandi di e krísis di corona riba e komunidat Boneriano, a disidí (mas ku klaro teniendo medidanan di prekoushon na kuenta, manera tene un meter i mei di distansia), pa reuní mas frekuente. For di e promé reunion riba 12 di mart último ku a dediká na e krísis di corona, e partidonan a reuní dos biaha mas.

Diálogo Sentral ta atmirá e esfuersonan enorme di Eilandelijk Beleidsteam (EBT). Tur kos ta indiká ku a tuma sufisiente medida pa protehá salubridat di pueblo. Miéntras tantu Kolegio Ehekutivo ta konsentrá riba posibilidatnan pa tene e konsekuensianan sosial-ekonómiko mas limitá posibel. Gobièrnu no por hasi esei su so. Diálogo Sentral tin un ròl importante ku no solamente konosementu, pero tambe tresiendo huntu hopi eksperensia di práktika di tur esnan embolbí. Hustamente den e tempu aki ta rekerí un enfoke integrá. “Tur hende sa ku durante e tempu pekuliar aki, mas ku nunka ta nesesario pa anda huntu. Solamente ku otro, dor di uni forsa, nos por superá esaki komo isla”, segun diputado di Asuntunan Ekonómiko, Elvis Tjin Asjoe, kende a asumí presidensia di Diálogo Sentral temporalmente miéntras Jan-Willem van den Braak ta na Hulanda Oropeo. 

E promé grupo di trabou establesé, ta analisá kon e medidanan di apoyo tumá kaba, ta funshoná den práktika i si ta nesesario hasi ahuste òf komplementashon. Salubridat Públiko ta primordial pa Diálogo Sentral, pero una bes ku ekspertonan médiko ta konsiderá hustifiká pa habri ekonomia bèk, ta importante pa ta bon prepará. E di dos grupo di trabou p’esei ta wak senarionan pa ora de-eskalá medidanan restriktivo (por ehèmpel prohibishon di entrada na e isla).