Ekipo médiko i remedi pa tratamentu di pashèntnan ku corona na kaminda pa Sint Maarten
For di e base aéreo di Eindhoven, un avion di transporte C-17, a sali rumbo pa Sint Maarten awe mainta ku ekipo médiko, ekipo di protekshon i remedinan pa tratamentu di pashèntnan ku tin e vírus di corona. Parti di esaki ta un hospital móbil, asina yamá “Hospitainer”, ku kual ta realisá 6 espasio kompletu di kuido intensivo. Banda di esei, ta inkorporá ekipo pa realisá 6 espasio adishonal di kuido intensivo den hospital na Sint Maarten.
E espasionan adishonal di kuido intensivo ta forma parti di e ekspanshon di kapasidat destiná pa pashèntnan di tur e islanan di e parti Karibense di Reino. E espasionan aki ta e proménan ku ta keda realisá na Sint Maarten pa motibu ku aktualmente ta mas nesesario pa reforsá e kapasidat médiko na Isla Ariba segun RIVM.
Huntu nos ta traha hopi duru
Sekretario di Estado Paul Blokhuis (VWS): "E transporte akí pa Sint Maarten ta un paso konkreto pa amplia mas akshon di yudansa médiko pa tur e islanan. Kontinuamente tin konsulta entre tur envolví aki na Hulanda i tambe den e partinan Karibense di Reino. Huntu nos ta traha hopi duru pa evitá ku e virus di corona ta sigui plama i mes momentu hasiendo máksimo esfuerso pa kuida e pashèntnan ku tin e virus di corona mas mihó posibel.
Personal médiko adishonal
Pa fortifiká e kapasidat médiko tambe tin mester di mas personal médiko. Pa ku esei, palabrashonnan ta keda hasí ku un kompania internashonal ku ta enkargá ku e traspaso di personal médiko. E promé grupo di dòkter i enfermeronan ta spera di yega Sint Maarten den transkurso di e próksimo siman.