Gobièrnu di Reino i Entidat Públiko Boneiru a uni forsa pa organisá akohida di emergensia pa mucha

Notisia | 06-04-2020 | 22:31

Dor di e medida ya menshoná i pa motibu ku no ta tur mayor ku ta traha den funshonnan vital òf krítiko por organisá nan akohida pa nan yu, gobièrnu di Reino i Entidat Públiko Boneiru a uni forsa pa regla akohida di emergensia pa e grupo spesífiko aki.

Un tim di krísis ta kordiná, evaluá i tuma e pasonan nesesario pa ofresé un akohida responsabel pa mayornan ku ta ehersé un funshon indispensabel durante di e periodo di krísis aki. Ora di repartí e muchanan bou di e diferente krèshnan, skol òf otro instituto, lo tene debido kuenta ku e medidanan proklamá dor di gezaghèber pa medio di e ordenansa di emergensia.

Riba konseho di EBT (Eilandelijk Bestuurs Team) gezaghèber ta determiná kua funshonnan ta vital òf krítiko na e momento aki. Den EBT tin representashon di tur organisashon ku ta di importansia durante di un kalamidat. 

Algun organisashon ku ta vital na e momento aki ta: kuido médiko, polis, prisòn,  bombero, Kmar, duana, tim di krísis i personanan ku ta elaborá den akohida di emergensia. Esaki ta djis pa menshoná algun. EBT por amplia i ahustá e lista aki na momentu ku ta nesesario.

Algun funshon krítiko ta entre otro; supermarket, kompanianan di utilidat manera WEB i Selibon.

E tim di krísis ya a aserká e organisashonnan vital i ta den e proseso pa determiná e funshon nan krítiko. 

Ta bon pa enfatisá un biaha mas ku e akohida di emergensia pa mucha ta solamente posibel ora sigui e instrukshonnan ku a ser partí pa e kompania, ku dor di EBT tim a ser konsiderá komo vital òf krítiko.

Ta supliká tur mayor pa mantené tur mucha ku tin síntoma di grip na kas i no presentá na akohida di emergensia.

Pa pregunta relashoná ku akohida di emergensia, por tuma kontakto ku tim di krísis via e mail adres noodkinderopvang@rijksdienstcn.com