Ofisina di dòkter di kas Hermelijn ta haña dòkter nobo

Riba 14 di òktober 2020 lástimamente Dr. Hermelijn a fayesé. E tabata mashá stimá bou di su pashèntnan i tabatin un papel importante den e koperashon den e kuido di dòkter di kas na Boneiru. For di su fayesementu no tabatin un dòkter di kas mas pa su ofisina.

Dòkter ta midi preshon

P’esei komo solushon temporario Ministerio di VWS a tuma dokter Eijsenga komo dòkter suplente e último lunanan aki pa asina pashènt por a aserk’é ku pregunta di kuido. E tabata hasi esaki ku asistente di dòkter Harriet Gombert i e otro kolaboradónan di e práktika. Asina tur pashènt por risibí e kuido ku nan tin mester. Pa un solushon struktural ta importante ku un otro dòkter ta tuma e práktika ofer. Pasobra ta importante pa e kuido di e pashèntnan den futuro tambe ta bon reglá. P’esei Ministerio di Salubridat, Bienestar i Deporte a buska un dòkter di kas nobo ku por tuma e práktika ofer. Entretantu dòkter Eijsenga indiká ku for di 14 di desèmber e por kontinuá e práktika. E ta bin biba na Boneiru definitivamente i asina ta bira e tenedó di práktika nobo di e ofisina di dòkter di kas.

Kiko esaki ke men pa e pashèntnan?

Pa motibu di e situashon agudo, lo pèrkurá pa un tumamentu ofer rápido di e práktika dor di dòkter Eijsenga. Lo inskribí tur pashènt ku anteriormente tabata risibí kuido for di e práktika di dòkter di kas di dòkter Hermelijn outomátikamente na e práktika nobo di dòkter di kas dòkter Eijsenga. E pashèntnan mes no tin nodi di hasi nada p’esaki. Pa e kontinuidat i kalidat di kuido ora tuma un práktika ofer, tur fail standart ta pasa ofer pa e tenedó di e práktika nobo. P’esei dokter Eijsenga ta tuma e failnan médiko di e pashèntnan ofer.

Sitio nobo di práktika di dòkter di kas Eijsenga

E práktika di dòkter Eijsenga ta bai un sitio nobo. Pasobra e práktika lo bai huntu ku e práktika di dòkter Miranda.

E adrès di e práktika nobo di dòkter di kas Eijsenga ta: Kaya Monseigneur Niewindt 3. E práktika di dòkter Eijsenga ta alkansabel via number di telefòn770 8884.