Défisitnan komersial Boneiru i Saba mas haltu den 2019
Di e islanan den Hulanda Karibense e défisit komersial di Boneiru a subi di mas fuerte den 2019. Esun di Saba tambe ta mas haltu, miéntras ku e défisit komersial di Sint Eustatius ta mas abou ku na 2018. Esaki CBS ta informá a base di sifranan nobo.
Hulanda Karibense tin un défisit komersial struktural. Esaki ta ora tin mas importashon ku eksportashon di produkto. Kompará ku Hulanda Oropeo, ta produsí relativamente poko na Boneiru, Sint Eustatius i Saba.
Boneiru: défisit komersial 30 porshento mas haltu den sinku aña
Boneiru den 2019 a importá 241 mion dòler mas na produkto ku a eksportá. Den sinku aña di tempu e défisit komersial di Boneiru a subi ku 30 porshento. Kompará ku 2018 e subida tabata 13 porshento. Den 2019 e balor di importashon a subi ku e mesun porsentahe te ku 253 mion dòler. Mashin a tuma mayor parti di e kresementu aki pa su kuenta. E balor di eksportashon (12 mion dòler) a krese ku 29 porshento kompará ku un aña anterior.
Saba: importashon kasi igual, bahada di eksportashon
Na Saba e balor di produktonan importá den 2019 tabata 21 mion dòler, meskos ku na 2018. E eksportashon di produkto a baha ku 60 porshento na balor kompará ku un aña anterior. Na final di kuenta e défisit komersial di Saba a krese ku 2 porshento te 21 mion dòler den 2019.
Sint Eustatius: bahada di défisit komersial ta sigui
Despues di un punto kulminante na 2017, e défisit komersial di Sint Eustatius despues di 2018 i tambe 2019 ta mas abou kompará ku un aña anterior. Ku un bahada di 6 porshento e défisit ta suma 44 mion dòler den 2019. Tantu e balor di importashon komo di eksportashon a keda bou di e nivel di 2018. E balor di produktonan importá a baha ku 11 porshento te 45 mion dòler. E eksportashon di produkto a suma 1 mion dòler, 68 porshento bou di e balor di 2018.
Kresementu di e défisit komersial di Boneiru prinsipalmente dor di mashin i material di transporte
Boneiru den 2019 a importá pa 76 mion dòler mas na mashin i material di transporte ku a eksportá. E défisit komersial aki ta kasi un tersera parti mas haltu ku den 2018, i kasi kompletamente responsabel pa e kresementu di e défisit komersial total. Serka otro kategorianan di produkto e kresementu tabata ménos fuerte.
E défisitnan komersial di produktonan fabriká (+10 porshento), i di kuminda i animal bibu (+8 porshento) ta sigui na un distansia.
Apsolutamente mirá mashin i material di transporte den 2019 a kontribuí di mas tantu na e défisit komersial total di Boneiru. Di e 241 mion dòler, kasi un tersera parti a bini pa kuenta di e kategoria di produkto aki. Na kuminda i animal bibu, i produktonan fabriká a importá respektivamente 44 i 38 mion dòler mas ku a eksportá.
Fuentenan
Hulanda Karibense; balor di importashon, eksportashon i saldo komersial pa kada isla
Hulandes: https://opendata.cbs.nl/statline/#/CBS/nl/dataset/82658ned
Ingles: https://opendata.cbs.nl/statline/#/CBS/en/dataset/82658eng
Hulanda Karibense, Boneiru; balor di importashon, eksportashon i saldo komersial, SITC
Hulandes: https://opendata.cbs.nl/statline/#/CBS/nl/dataset/82659ned
Ingles: https://opendata.cbs.nl/statline/#/CBS/en/dataset/82659eng