Diálogo Sentral a lansa na Sint Eustatius
Riba djárason 26 di febrüari representante di gobièrnu lokal, di Kámara di Komèrsio, di dunadó di trabou i di trahadó a reuní pa papia tokante establesimentu di ‘Diálogo Sentral Statia’. Tur partido ta kompartí e importansia di un mesa di konsulta i ta dispuesto na partisipá. Ku determinashon di un protokòl, Diálogo Sentral Statia awor ta un realidat.
Nan ta di akuerdo ku un bon Diálogo Sentral por kontribuí na fortifikashon di apoyo (formamentu di kònsènsùs) pa un desaroyo sosioekonómiko pa Sint Eustatius. Esaki na su turno ta benefisiá tur habitante, kompania i institushon.
Diálogo Sentral ta operá independiente for di komposishon di gobièrnu di e isla i ta independiente di e Community Advisory Board (temporal), ku tin un status legal. E asientonan den Diálogo Sentral ta repartí den entidat públiko, organisashon di dunadó di trabou STEBA, sindikatonan All for One i WICSU i Kámara di Komersio. E representante lokal di unidat SZW di RCN ta partisipá komo konsehero.
Diálogo Sentral por lo tantu ta ofresé un forma di konsulta strukturá entre gobièrnu lokal i e representantenan di dunadó di trabou i di empleado. Diálogo Sentral ta enfoká prinsipalmente riba temanan sosioekonómiko aktual pa e isla. Tur partido embolbí por hiba temanan dilanti pa Diálogo Sentral ku tin di aber ku eseinan. Ademas, Diálogo Sentral por duna konseho pidí na gobièrnu sentral. Esaki por ta e kaso si por ehèmpel ta presentá proposishon di lei pa konsulta.
Siguiendo e reunion tokante lansamentu di Diálogo Sentral Statia ya tabatin un promé reunion sustantivo, kaminda a papia tokante solisitutnan di konseho di Ministerio di SZW relashoná ku respektivamente e sistema di ferlòf, legislashon pa empleadonan inkapasitá pa traha i un proposishon pa un lei nobo tokante kondishon di trabou na Hulanda Karibense. E próksimo reunion di Diálogo Sentral di Statia ta tuma lugá riba 8 di aprel 2020.