Ainda no tin motibu pa suspendé traslado médiko di ZVK pa e parti Franses di St. Martin
Zorgverzekeringskantoor Hulanda Karibense (ZVK) a tuma nota di informenan entre otro riba retnan sosial, tokante posibel infekshon ku Covid-19 (e asina yamá Coronavirus) na e partinan Franses den Karibe, St. Martin i San Bartolomé.
Outoridatnan lokal di salubridat a pone dos pashènt involukrá den isolashon na hòspital Louis Constant Flemming na Marigot, St. Martin (parti Franses). Outoridatnan Franses a konfirmá e kontaminashonnan i isolashon di e personanan afektá.
Gerente di e Programa di Kuido i Hubentut na Hulanda Karibense di Ministerio di Salú, Bienestar i Deporte, huntu ku RIVM ku debido atenshon ta sigui tur desaroyo na Hulanda i Sint Maarten en konekshon ku e situashon aki. Lo tene aseguradonan di ZVK na altura di desaroyonan i posibel konsekuensia pa nan trasladonan médiko pa parti Franses di St. Martin.
Ainda no tin motibu pa suspendé e traslado médikonan aki. Ta pidi aseguradonan pa sigui informashon duná pa outoridatnan di salubridat i di nan respektivo entidat públiko di aserka.