OCW i Direktiva di Skolnan ta hasi yamada na mayor i tutor
A base di e ordenansa di emergensia ku a drenta na vigor dia 18 di mart último, tur skol a sera nan portanan. Esaki no ta nifiká ku fakansi a kuminsá. Skolnan a skohe na benefisio di e alumno pa ofresé enseñansa for di distansia. Esaki ta nifiká ku tur alumno di skol primario i sekundario a i ta keda risibí tarea di skol pa hasi na kas. For di distansia e dosente/mentor ta duna guia, kontrolá tareanan i duna splikashon kaminda ta nesesario. E alumno i dosente por komuniká ku otro via telefòn, app òf mail. Den kasonan spesífiko e dosente por pidi e alumno pa pasa skol pa risibí tarea i/òf material adishonal.
Direktiva di skolnan i ministerio di enseñansa kier hasi un yamada urgente na tur mayor i tutor pa motivá i stimulá nan yunan pa traha nan tarea di skol i keda den kontakto regular ku nan dosente/mentor. E periodo akí ta keda un periodo di lès i ta solamente e forma di duna lès ta distinto. Dosente- i skolnan lo hasi nan máksimo esfuerso pa evitá retraso den desaroyo di nos alumnonan. Ta p’esei ta hasi un yamada un biaha mas na tur mayor i tutor pa kumpli ku nan responsabilidat. Kontrolá, yuda i sòru pa e yu hasi tareanan di skol i entrega esakinan na tempu.
Èksamen (vmbo, mavo, havo,vwo)
Debí na e krísis mundial okashoná dor di e vírus corona, minister di enseñansa di Hulanda a tuma e desishon pa kanselá tur èksamen sentral pa e tipo di enseñansa vmbo, mavo, havo i vwo pa loke ta trata aña eskolar 2019/2020. E desishon drástiko aki ta trese hopi kambio kuné.
Primeramente lo no tin èksamen sentral den luna di mei i yüni, manera tabata e kustumber e aña eskolar aki. E èksamen di skol (schoolexamen) ku skol mes ta traha lo determiná si e alumno a terminá e aña eskolar eksitoso.
E sifra final di e aña akí ta e sifra será (afgerond) di e èksamen di skol. Normalmente e sifra final ta e promedio di e sifra di èksamen di skol i e èksamen sentral.
Dor di e sirkunstansia no normal e aña aki lo ahustá e norma pa slag òf drùip. Den kurso di e simannan benidero lo tin mas klaridat ta kua norma lo ta aplikabel.
Skolnan mester sòru pa ehekutá tur èksamen di skol konforme planifikashon di prueba (PTA). Kambio di e planifikashon di prueba por tuma lugá solamente den konsulta ku inspekshon di enseñansa i konseho di konsulta di skol.
Finalmente mester palabrá den kua periodo lo entregá diploma i lista di sifra.
Ta hasi un supliká na alumnonan di klas di èksamen pa keda den kontakto ku skol pa e último desaroyonan.