Ampliashon di prohibishon riba aglomerashon i evenementu
For di 27 di mart a amplia e ordenansa di emergensia ku un prohibishon general pa evenementu. Aglomerashonnan di hende ku mas di 50 persona tampoko ta pèrmití, tantu den esfera públiko komo privá. Banda di esei ta konta ku playanan públiko di Boneiru lo no ta aksesibel mas pa gruponan di mas ku 3 persona. Kasinonan i klupnan di sèks tambe mester sera. Gezaghèber a disidí esaki riba konseho di e Eilandelijk Beleidsteam (EBT), pa protekshon di e poblashon di Boneiru kontra di e vírùs di corona. E prohibishon ta konta ku efekto inmediato te en todo kaso 30 di aprel òf e momentu ku disidí diferente.
Gezaghèber anteriormente a tuma un kantidat di medida preventivo pa protehá e abitantenan di Boneiru kontra vírùs di corona. Un di e medidanan ei ta trata e prohibishon riba evenementunan pa mas ku 50 persona. Ta intensifiká e medida aki awor, ku un prohibishon general riba evenementu i un prohibishon riba aglomerashon di mas ku 50 hende den esfera públiko i privá, tantu paden komo den aire liber.
Esaki no ta konta pa reunionnan ku ta nesesario pa e kontinuashon di institutonan, kompanianan i otro organisashonnan. Sí ta konta pa tur e reunionnan aki ku no por tin mas ku 50 persona presente i e presentenan mester (por) mantené un distansia di 1,5 meter.
Kua establesimentunan ta será
Banda di klupnan di deporte i fitness (inkluso souna), skolnan i akohida di mucha, awor kompanianan relashoná ku sèks i kasinonan tambe mester sera na Boneiru. Establesimentunan pa kome i bebe por keda habrí solamente si nan por garantisá 1,5 meter di distansia entre klientenan i no permití mas ku 50 persona. Pa skolnan a hasi un eksepshon pa grupo 8 di e skol básiko i pa èksamen den enseñansa sekundario i avansá. Organisashonnan di akohida di mucha por keda habrí solamente pa akohida di muchanan di mayornan ku ofishinan vital. Gezaghèber ta determiná kiko ta funshonnan vital i ta regla e akohida via doñonan di trabou.
Playanan públiko será pa gruponan
A sera e playanan públiko riba Boneiru ku efekto inmediato pa gruponan di mas ku 3 persona, ku eksepshon di famia. Ku Pasku di resurekshon na kaminda hopi hende a kuminsá ku preparashon pa bai kamper, entre otro riba e playanan. Gobièrnu ta supliká tur hende pa kita palèt i otro material ku a instalá kaba, mas lihé posibel.