Oumentu kantidat di buelo i pasahero na Hulanda Karibense den 2019
Den 2019 avionnan a bula 25,6 mil bia pa i for di e tres islanan ku ta pertenesé na Hulanda Karibense. Esei ta kasi 11 porshento mas ku den 2018. E kantidat di pasahero a oumentá ku mas di 6 porshento. Na Aeropuerto Flamingo na Boneiru i Juancho E. Yrausquin na Saba tantu e kantidat di buelo komo e kantidat di pasahero a subi. Na F.D. Roosevelt Airport na Sint Eustatius e kantidat di buelo a baha, pero e kantidat di pasahero a keda kasi igual. Asina CBS ta informá a base di sifranan nobo.
Aeropuerto Flamingo na Boneiru tin di e tres aeropuertonan hulandes na otro banda di oséano, mas tantu moveshon aéreo i mas tantu pasahero. Despues di un bahada leve di e kantidat di buelo den 2016, e kantidat di moveshon aéreo a krese kada aña. Den 2019 e kantidat di buelo na Boneiru a subi te 15,7 mil, mas di 17 porshento mas kompará ku 2018.
Pa loke ta trata buelonan, òktober i novèmber tabata e lunanan mas drùk na e aeropuertonan na Hulanda Karibense, 2,3 mil buelo kada un i febrüari esun mas trankil (1,9 mil buelo).
Mayoria pasahero ta bula pa i for di Boneiru
Den 2019 mas di 457 biahero a bula pa i for di Hulanda Karibense. Di esakinan mas di 384 mil pasahero a biaha pa i for di Boneiru. Esei ta 84,1 porshento di e total kantidat di pasahero i 7 porshento mas ku den 2018.
E pista di aterisahe di Aeropuerto Flamingo na Boneiru tin un largura di 3 kilometer, loke ta hasi posibel ku avionnan mas grandi i mas pisá por aterisá. E pistanan di aterisahe na Sint Eustatius i Saba ku un largura di respektivamente 1,3 i 0,4 kilometer ta solamente adekuá pa avionnan mas chikitu.
Pa pasaheronan na Boneiru, Curaçao International Airport, konosí tambe komo Aeropuerto Hato, den 2019 tabata e lugá di origen i e lugá di destino mas frekuentá. Ounke esaki no ta nifiká ku Kòrsou ta e destinashon di unda a bin realmente òf destinashon final di e pasaheronan. Schiphol ta sigui na e di dos puesto.
Oumentu di kantidat di buelo i pasahero na Saba
Na e aeropuertonan di Sint Eustatius i Saba huntu a ehekutá mas di 9,9 mi buelo aña pasá, esaki ta un subida di mas di 2 porshento kompará ku 2018. Nan partisipashon konhunto den e total kantidat di buelo na Hulanda Karibense a suma den 2019 kasi 39 porshento.
Na F.D. Roosevelt Airport na Sint Eustatius a ehekutá 6,4 mil buelo aña pasá, na Juancho E. Yrausquin na Saba 3,5 mil.
Na e aeropuerto na Sint Eustatius a kantidat di buelo a baha ku 6,5 porshento kompará ku 2018. E kantidat di pasahero pa i for di Sint Eustatius tabata den ámbos aña kasi riba mes nivel di algu mas di 42 mil.
Aeropuerto Juancho E. Yrausquin na Saba, di e tres aeropuertonan na Hulanda Karibense, a mustra e subida di mas grandi tantu den kantidat di buelo komo den kantidat di pasahero transportá entre 2018 i 2019. E kantidat di buelo a subi ku mas di 22 porshento i e kantidat di pasahero transportá a krese den 2019 ku 8,5 porshento te 30,7 mil.
