Spich Gezaghèber 01-05-2020
Kerido ko-suidadano,
Manera ya a bira un kustumber, primeramente mi kier ta anunsiá e sifranan aktual pa loke ta trata COVID-19. Te ku awe a tèst total: 230 di kua 2 tèst tabata positivo i tur dos ya a rekuperá. 228 negativo tèst a sali negativo. Tin aktualmente 96 den karentena bou kua, si tur kos sigui bon e promé grupo di repatriante lo sali karentena djabièrnè awor i lo por regresá nan kas.
Ta un echo ku Boneiru a wòrdu di spar ku e vírùs di Corona no a plama di forma amplio riba nos isla. Tin hopi hende a traha duru pa logra esaki tantu di sektor médiko komo otro sektornan pero tambe e komportashon di mayoria hende a kontribuí en grande na e logro aki te awor. Hendenan ku a kumpli ku por ehèmpel karentena na momentu ku a instruí nan pa hasi esaki. Dos siman sin tin kontakto ku otro hende i sin por biba un bida normal no ta fásil.
Pero a hasi e sakrifisio aki tur hende di Boneiru. Huntu nos tur a i ta sigui uni forsa pa protehá nos mes i nos famia. Laga nos sigui tene nos mes na e reglanan i sigui tene otro skèrpi pa kumpli ku nan.
Ya ta preparando pa trese e di dos grupo di repatriante bek Boneiru. E fecha eksakto pa esaki lo mi anunsiá despues. Tambe a hasi petishon na minister di I&W pa ekstendé seramentu di tráfiko aéreo internashonal te ku 15 di mei.
Mirando ku no tin mas hende ku a tèst positivo pa e e vírùs di corona e dianan tras di lomba i si e situashon aki keda igual, pa djabièrnè awor mi lo por anunsiá den ki forma lo por suavisá e medidanan aktual di emergensia. Pensa aki riba entre otro habrimentu di skol i sitionan di ehersisio i deporte di forma kontrolá i gradual.
Den mi diskurso di siman pasá djabièrnè mi a hasi un yamada na tur habitante di Boneiru pa selebrá dia di Rincon den seno familiar tendiendo kuenta ku e reglanan stipulá pa loke ta trata distansia sosial i no mas ku 50 hende huntu.
Lamentablemente mi a haña e informashon ku no ta tur hende a tene nan mes na e reglanan aki den e fin di siman tras di lomba. Den entre otro e bario Rincon tabatin hopi moveshon di hende riba otro. Mi ta bolbe hasi un yamada urgente na un i tur.
Tene bo mes na e reglanan pa asina kuida bo mes i bo famia. Ta solamente dor di mantené nos mes na esakinan, tambe den e fin di siman di selebrashon aki, por konsiderá pa suavisá e reglanan di emergensia stipulá.
Departamento di mantenshon i supervishon huntu ku kuerpo polis i Kmar ta kontrolá di forma severo den e dianan binidero i lo no basilá pa tuma medidanan kaminda ta nesesario. Esaki por tin konsekuensia fèrfelu pa esunnan ku no ta tene nan mes na órden i regla.
Mi sa ku kada un di nos tin simannan kaba ku nos a sakrifiká i adaptá hopi
kos ku nos tin kustumber di hasi den nos bida diario. Sakrifiká awor pa den futuro serkano nos por ta aun mas serka di otro.
Disfrutá di e dianan di fiesta binidero den esfera di famia.